Prishtinë, 1 shtator, NOA - Policia e Kosovës dhe Agjencia e Kosovës për Inteligjencë kanë nënshkruar një marrëveshje bashkëpunimi mes tyre, e cila nënkupton interesimin e tyre për bashkëpunim me të thelluar në fushën e zbatimit të ligjit dhe sigurisë në vend.
Marrëveshja në fjalë është nënshkruar mes drejtorit të përgjithshëm të Policisë së Kosovës, Sheremet Ahmeti dhe atij të AKI-së, Bashkim Smakaj
Kjo marrëveshje e bashkëpunimit ka për qëllim edhe ofrimin e ndihmës dhe përkrahjes Agjencisë së Kosovës për Inteligjencë nga Policia e Kosovës në ngritjen e kapaciteteve të saja njerëzore.
"Policia e Kosovës do të mbështesë Agjencinë Kosovare të Inteligjencës në të gjitha fushat edhe në fushën e shkëmbimit të kuadrove për të mbështetur dhe përkrahur AKI-në, po ashtu edhe në shkëmbimin e informatave gjithashtu AKI-ja do të ketë mundësinë e qasjes edhe në bazën e të dhënave të PK-së", - theksoi ndër të tjera Drejtori i Përgjithshëm i PK, Sheremet Ahmeti.
Edhe drejtori i AKI, Bashkim Smakaj ka pohuar se kjo marrëveshje është një hap shumë i rëndësishëm e njëkohësisht edhe një kërkesë ligjore.
n.e/NOA
