Tiranë, 2 shtator, NOA - Kryeministri Berisha ka zhvilluar sot mbledhjen e tij të fundit me kabinetin qeveritar, i cili ka drejtuar vendin gjatë mandatit në periudhën e viteve 2005-2009.
Sipas të dhënave pranë Këshillit të Ministrave për agjencinë NOA, kreu i qeverisë e ka shfrytëzuar këtë takim të fundit me ministrat e kabinetit të tij për të vënë në dukje arritjet dhe punën e përbashkët që kanë arritur të realizojnë gjatë këtyre 4 viteve së bashku.
Duke analizuar reformat e ndërmarra prej secilës ministri, Berisha ka thënë se Shqipëria ka arritur tashmë që të jetë një kampione e realizimit të tyre.
"Arritja më e madhe që ne kemi realizuar është anëtarësimi i Shqipërisë në NATO", mësohet të ketë deklaruar kryeministri gjatë mbledhjes së qeverisë para ministrave të tij.
Sikundër ka shtuar më pas, se arritje tjetër e qeverisë së tij në këta katër vjet, që vlen për t'u mbajtur mend është ajo e realizimit të rritjes më të madhe të nivelit të pagave dhe pensioneve.
"Këto ishin katër vitet e reformave të mëdha", e ka përmbyllur fjalën Berisha, duke vlerësuar në këtë mënyrë punën e kabinetit në mbledhjen e tij të fundit.
n.e/NOA
