Tiranë, 8 shtator NOA Foto UPDATE - Kryetare e Kuvendit të Shqipërisë në katër vitet e ardhshme do të jetë deputetja Jozefina Topalli.
Kuvendi i ri i Shqipërisë në seancën e dytë të tij ka votuar me votim të fshehtë për kandidaturën e vetme të propozuar nga PD, Jozefina Topallin.
Në votim morën pjesë 75 deputetë, dhe vetëm njëri prej tyre votoi kundër këtij propozimi.
Sipas procedurës, Â 15 deputetë të PD-së paraqitën sot me shkrim në sekretarinë e përkohshme të kuvendit, propozimin e tyre për Jozefina Topallin si kryetare e Kuvendit.Votimi u zhvillua i fshehtë.
Votimi u drejtua nga një komisioni votimi i përbërë nga 5 deputetë.
Më tej drejtuesi i seancës thirri kryetaren e zgjedhur me votë për t'u ulur në karrigen e tij.
Në fjalën e saj, zonja Topalli falënderoi gjithë deputetët që e votuan dhe u uroi atyre punë të mbarë në legjislaturën e re.
Topalli shprehu keqardhjen për mungesën e socialistëve në sallën e kuvendit për të justifikuar siç tha ajo votën e popullit.
"Jam e bindur se ne do të bashkëpunojmë me ta. Sepse ne në fund të fundit jemi qytetarë të këtij vendi. Unë i ftoj sërish deputetët e opozitës të vijnë në sallë për të bashkëpunuar me ne. Është një nder të jesh një ndër 140 deputetët e kuvendit të Shqipërisë", tha Topalli.
Seanca e radhës pritet të thirret kur kabineti i ri të dalë me dekretet përkatëse nga presidenti i Republikës, i cili do të ngarkojë kryeministrin në detyrë Sali Berisha për formimin e qeverisë së re.
Â
