"I pandehuri Fatmir Mediu është zgjedhur deputet i legjislaturës së re. Kjo rrethanë nuk lejon vazhdimin e procedimit penal në ngarkim të tij për aq kohë sa nuk ka një autorizim për ndjekje penale të dhënë nga Kuvendi i Shqipërisë mbas marrjes prej tij të mandatit të deputetit"
Tiranë, 14 Shtator NOA - Gjykata e Lartë ka shpjeguar mesditën e sotme anën ligjore të vendimit që u mor mbi pushimin e çështjes për Fatmir Mediun i akuzuar mbi tragjedinë e Gërdecit.
Ida Vodica, zëdhënëse e Gjykatës së Lartë tha sot se "Kolegji Penal i Gjykatës së Lartë, pasi dëgjoi mbrojtësit e të pandehurit Fatmir Mediu që pretenduan faktin e zgjedhjes deputet të të mbrojturit prej tyre, fakt që sipas tyre kushtëzon vazhdimin e ndjekjes penale dhe përfaqësuesit e organit të akuzës që kërkuan vazhdimin e gjykimit, vërejtën se; në baze te vendimit nr. 602, dt. 01.08.2009 të Komisionit Qendror të Zgjedhjeve, rezulton se i pandehuri Fatmir Mediu është zgjedhur deputet i legjislaturës së 18 të Kuvendit të Shqipërisë. Kjo rrethanë nuk lejon vazhdimin e procedimit penal në ngarkim të tij për aq kohë sa nuk ka një autorizim për ndjekje penale të dhënë nga Kuvendi i Shqipërisë mbas marrjes prej tij të mandatit të deputetit".
"Për këto arsye, mbështetur në nenin 73/2 të Kushtetutës së Shqipërisë dhe nenet 290/e dhe 387/1 të Kodit të Procedurës Penale, Kolegji Penal i Gjykatës së Lartë, vendosi pushimin e procedimit penal në ngarkim të të pandehurit Fatmir Mediu për shkak se ndjekja penale ndaj tij nuk mund të vazhdojë", - përfundon sqarimi i Gjykatës së Lartë.
e.r/NOA
