Beograd, 21 shtator NOA-Një turist australian është sulmuar në parkun qendror të Beogradit.
25 vjeçari është i huaji i dytë që sulmohet brenda katër ditësh në kryeqytetin serb.
Të enjten e kaluar një 28 vjeçar francez u sulmua në Beograd nga huliganët e futbollit dhe vazhdon të jetë në gjendje kritike për jetën.
Kryebashkiaku i Beogradit, Dragan Djilas, i deklaroi TV B92 se sulmi ndaj turistit australian paraqet ngjarjen e pakëndshme të radhës, pasi ditët e fundit ka pasur mjaft arrestime në kryeqytetin serb, dhe se disa raste tashmë janë dënuar nga gjykatësi për kundërvajtje.
Prokuroria e Qarkut në Beograd ka kërkuar nisjen e hetimeve kundër 11 të dyshuarve për sulmin brutal ndaj tre shtetasve francezë para ndeshjes së futbollit Partizan-Tullouse. Sipas zëdhënësit të Prokurorisë, Toma Zoric, ata akuzohen për vrasje dhe tentativë vrasje, prandaj prokurori ka kërkuar caktimin e arrestimit për të gjithë.
Për këtë vepër penale parashihet dënimi mes 30 dhe 40 vjet burg.
