Tiranë, 25 shtator NOA - Kryetarja e Kuvendit të Shqipërisë, Jozefina Topalli priti sot në takim, ambasadorin e Suedisë, Lars Freden.
Duke u ndalur në zhvillimet e fundit në Shqipëri, Kryetarja e Kuvendit shprehu kënaqësinë që në 28 qershor Shqipëria zhvilloi zgjedhje të lira, me një infrastrukturë moderne të aplikuar për herë të parë, e që morën vlerësimet pozitive nga OSBE, KE e institucione të rëndësishme ndërkombëtare.
"Procesi zgjedhor në 93 për qind të qendrave të votimin u vlerësua mirë dhe shumë mirë" tha Topalli.
Kryetarja e Kuvendit vlerësoi faktin që sistemi zgjedhor dhe Kodi i propozuar nga opozita, ndërtimi i Komisionit Qendror u votuan me konsensus në parlament. Komisionerët e majtë e të djathtë si asnjëherë më parë firmosën në procesverbalet e zgjedhjeve dhe Komisioni Qendror i Zgjedhjeve votoi në unanimitet rezultatin përfundimtar.
Duke theksuar rolin thelbësor të parlamentit si pushteti i drejtpërdrejtë i sovranit, Kryetarja e Kuvendit, nënvizoi se prania e opozitës në parlament është shumë e rëndësishme për vetë opozitën por edhe për vendin duke shtuar se e ka ftuar vazhdimisht opozitën të vijë në Kuvend.
Kryetarja e Kuvendit tha se "Parlamenti është vendi i debatit, vendi i negociatave dhe i konsensusit. Katër vitet e mandatit të kaluar janë dëshmi e konsensuseve të mëdha të arritura."
Më tej biseda u ndal edhe në liberalizimin e vizave dhe kërkesën e Shqipërisë për statusin e vendit kandidat në BE, ku Kryetarja e Kuvendit theksoi rëndësinë e mbështetjes së Suedisë në afrimin e vendit tonë me Bashkimin Evropian.
Kryetarja e Kuvendit përshëndet deklaratën e presidencës suedeze për vlerësimin e zgjedhjeve në Shqipëri.
k.k/NOA
Â
