Tiranë, 2 tetor NOA-Ministri i Ekonomisë, Tregtisë dhe Energjetikës, Dritan Prifti, shkarkoi sot Këshillin Mbikqyrës të KESH për shkak të abuzimeve në shoqëri të evidentuara nga Kontrolli i Lartë i Shtetit, ndërkohë ka emëruar menjëherë Këshillin e ri të drejtuar nga Pjetër Dema.
KLSH ka konstatuar shumë shkelje dhe abuzime me ligjin dhe fondet publike në KESH dhe ka kërkuar masa të rrepta për KM dhe drejtues të Kesh-it.
Ministri Prifti kërkoi në mbledhjen e parë të organit drejtues të shoqërisë analizimin me përgjegjësi të konkluzioneve të Kontrollit të Lartë të Shtetit si dhe marrjen e masave të nevojshme për mbarëvajtjen e administrimit të shoqërisë.
Këshilli Mbikqyrës i sapoemëruar i shoqërisë ka në përbërje të tij personalitete të njohura të ekonomisë, energjitekës dhe akademisë.
Në mbledhjen e tij të parë, Këshilli Mbikqyrës zgjodhi si kryetar zotin Pjetër Dema, i cili ka një eksperiencë të gjatë në sektorin e energjisë.
Z. Dema ka ushtruar më parë detyrën e zv/ministrit të Energjisë dhe ka qenë kryetar i Entit Rregullator të Energjise.
Anëtarë të tjerë të Këshillit të ri Mbikqyrës janë edhe Jorgaq Kaçani, rektor i Politeknikut, Zef Preçi si edhe ekspertë të tjerë të ekonomisë.
