Nga Rajmonda Lajthia
Tiranë, 7 Tetor NOA - Pas dështimit të radhës të privatizimit të kompanisë së sigurimeve INSIG, Ministria e Financave i kërkon parlamentit të ndryshojë skemën e shitjes.
Qeveria ka vendosur këtë radhë pas zvarritjesh e ndryshimesh pa fund, të privatizojë 100 për qind të aksioneve. Por kësaj radhe në formulën e shitjes është lënë e hapur mundësia që blerësi të jetë edhe biznes vendas, me eksperiencë në fushën e sigurimeve.
Linda Rusmaili, Drejtore Juridike në Ministrinë e Financave shpjegon se qeveria kërkon të shesë 100% aksionet, por në rast se një gjë e tillë nuk ndodh, atëherë për pjesën që do të mbetet pa u shitur do të dalë një ofertë publike brenda tre vitesh.
Pak para zgjedhjeve parlamentare të 28 qershorit qeveria nxitoi të shpallte fituesin e tenderit për shitjen e INSIG-ut.
Një kompani amerikane ofroi 25 milionë euro për 61 % të aksioneve, e cila shumë shpejt u tërhoq nga gara duke anuluar tenderin.
Aksionerë të INSIG ishin edhe Korporata Financiare Ndërkombëtare dhe Banka Evropiane për Rindërtim dhe Zhvillim të cilat hoqën dorë nga pronësia prej 39 % e aksioneve.
Aktualisht INSIG është një kompani 100% shtetërore e cila kontrollon rreth 16 % të tregut të sigurimeve kur vetëm pak vite më parë ishte lider absolut, por me menaxhimin e keq që i shërbente kompanive të tjera, ia "dhuroi" atyre klientët.
r.l/e.r/NOA
