Tiranë, 8 tetor NOA-Ministri i Brendshëm Lulzim Basha zhvilloi sot një vizitë në Qendrën e Personalizimit të Kartave të Identitetit dhe Pasaportave Biometrike.
Basha u prit në këtë qendër nga Kryetari i Bordit të Fondit Shqiptaro-Amerikan të Ndërmarrjeve Michael Granof dhe Manaxheri i Përgjithshëm i kompanisë konçesionare "Aleat" Jean -Allain Jouan.
Duke vlerësuar faktin se brenda një periudhe të shkurtër që nga fillimi i procesit numërohen afro 220 mijë aplikime për pasaporta biometrike, 208 mijë prej të cilave tashmë janë prodhuar, ministri Basha deklaroi se shpejtësia e këtij procesi është më e larta ndër vendet e rajonit.
"Nuk duhet të ketë asnjë dyshim se me këtë ritëm, ndoshta deri në tremujorin e parë të vitit tjetër, Shqipëria do të ketë numrin më të madh të pasaportave biometrike për frymë të lëshuara në rajon, duke tejkaluar edhe Maqedoninë që deri më tani është e para në këtë proces.
Kjo është një dëshmi e qartë e suksesit të qeverisë shqiptare për të realizuar këtë kusht themelor për lëvizjen e lirë të qytetarëve shqiptarë në të gjithë vendet e Europës", tha Basha
Ministri i Brendshëm u bëri thirrje të gjithë qytetarëve shqiptarë të aplikojnë sa më parë për pasaportë biometrike Â
Sipas tij, investimi në një pasaportë biometrike është investimi më i sigurtë për lëvizjen pa viza individualisht si dhe për të gjithë bashkëqytetarët shqiptarë.
"Sa më shpejt të aplikojnë për pasaportat biometrike, aq më e afërt do të jetë dita kur shqiptarët do të lëvizin pa viza në të gjitha vendet e Evropës:, u shpreh ministri.
Ministri Basha deklaroi gjithashtu se sipas udhëzimeve të kryeministrit Berisha, Ministria e Brendshme po punon për konsolidimin edhe më tej të këtij procesi me shtrirjen e tij edhe në përfaqësitë tona diplomatike në vendet ku emigracioni shqiptar është më i konsiderueshëm, për t'i ardhur në ndihmë edhe qytetarëve shqiptarë që punojnë e jetojnë jashtë vendit.
Â
Â
Â
