Tepelenë, 9 tetor, NOA - Forcat e policisë së Tepelenës kanë mundur të ndalojnë mëngjesin e sotëm dy persona, babë e bir, të cilët dyshohet se janë autorë të një vjedhje të kryer në bashkëpunim në muajin qershor në banesën e kryetarit të qarkut Gjirokastër, Arben Çulli, në Tepelenë.
Burimet policore konfirmojnë për agjencinë e Lajmeve NOA se dy të ndaluarit janë Kaso Zhola, 46-vjeç dhe djali i tij Zeman Zhola, 18-vjeç, që të dy lindur dhe banues në fshatin Veliqot.
Kapja dhe ndalimi e tyre u bë për arsye se më datën 18 qershor, ata kanë vjedhur në banesën e të lartpërmendurit Arben Çulli, shumën e 1.5 milionë lekëve të reja, si edhe katër aparate celularësh.
Në lidhje më këtë ngjarje u kryen të gjitha veprimet e nevojshme hetimore dhe materialet në ngarkim të shtetasëve të sipërpërmendur i kaluan Prokurorisë së Gjirokastrës për veprime të mëtejshme për veprën penale të "Vjedhjes kryer në bashkëpunim", parashikuar nga neni 134/3 i Kodit Penal.
