Tiranë, 10 tetor NOA - Një grup deputetesh të Partisë Socialiste, dolën sot me një thirrje për nëna dhe baballarë, që të protestojnë "pse ju hoqën nga vendet e punës".
Mimi Kodheli, Vasilika Hysi, Englantina Gjermeni dhe Olta Xhaçka dolën para mediave në një deklaratë të përbashkët ku ftuan "të gjithë qytetarët e Tiranës që të jenë sot në orën 5 pasdite, përpara selisë së kryeministrisë, për t'i treguar Sali Berishës se shqiptarët nuk janë çetë e tij, që ai mund t'i përdorë si të dojë".
"Duhet t'i tregojmë Sali Berishës dhe qeverisë së tij se jemi qytetarë të lirë dhe jo ushtarë të tij", - tha Mimi Kodheli.
"Ftojmë të gjithë ata që ndihen të nëpërkëmbur nga ky pushtet që nuk është i qytetarëve por i qeveritarëve, që flaken nga dyert e institucioneve vetëm se besuan apo mbështetën opozitën, në zgjedhjet e 28 qershorit", - vijon deklarata.
"Ftojmë të gjithë nënat dhe baballarët që janë kërcënuar dhe shkelur me këmbë nga pushteti, të shprehin me pjesëmarrjen dhe zërin e tyre në orën 5 pasdite revoltën e tyre ndaj një pushteti klanor e familjar, që nuk mendon për të ardhmen evropiane të shqiptarëve por vetëm për interesat e tyre", - vijon thirrja e grave deputete të PS.
f.sh/NOA
