Tepelenë, 15 tetor, NOA - Një kilogramë marijuanë e sekuestruar dhe një person i arrestuar në fragrancë ka qenë bilanci i një aksioni të ndërmarrë sot nga forcat e policisë së Gjirokastrës në një nga autobusat e linjës Gjirokastër-Tiranë.
Burimet policore konfirmojnë për agjencinë e Lajmeve NOA se ato kishin marrë informacion paraprak në rrugë operative se pikërisht, në autobusin e linjës së orës 23.00, Gjirokastër-Tiranë me targa GJ 61 52 A, do të ishte një çantë me lëndë narkotike të dyshuar si marijuanë, me destinacion Tiranën.
Menjëherë nga ana e policisë është ngritur një pikë kontrolli në vendin e quajtur "agjensia e qytetit Tepelenë", e vendosur në aksin rrugor Gjirokastër-Memaliaj dhe sapo
autobusi është afruar në qytetin e Tepelenës, ai është ndaluar nga postoblloku i policisë i ngritur për këtë qëllim.
Më pas, gjatë kontrollit të imtësishëm të ushtruar në këtë automjet rezultoi se në këtë autobuz , poshtë sediljes së shoferit është gjetur një çantë ku brenda saj poshtë disa rrobave kishte një pako e mbështjellë në formë të çrregullt e mbushur me lëndë narkotike e dyshuar si marijuanë me peshë 1 kilogramë.
Nga veprimet e para hetimore rezultoi se kjo çantë i përkiste Spiro Pepes, 56-vjeç, lindur dhe banues në Memaliaj, fatorino i autobusit, i cili u arrestua menjëherë.
Lënda narkotike u sekuestrua në cilësinë e provës materiale, ndërsa materialet e tjera i kaluan prokurorisë së Gjirokastrës për veprime të mëtejshme mbi veprën penale "Prodhim dhe shitje të narkotikëve", parashikuar nga neni 283 i Kodit Penal.
n.e/NOA
