Nga Rajmonda Lajthia
Tiranë, 24 Tetor NOA - Volumi i madh i investimeve publike gjatë këtij viti zgjedhor është shoqëruar edhe me një numër rekord të ankesave të biznesit, për tenderët e kryer nga Agjencia e Prokurimit.
Vetëm gjatë 10 muajve të këtij viti, numri ankesave ka arritur në 450, ndërkohë që për 2008-n, kjo shifër ishte 360. Përfaqësues të Avokatit të Prokurimeve thonë se ritmi i lartë i ankesave ka nisur gjatë muajit mars, kohë e cila përkon edhe me nisjen investimeve elektorale.
Altin Qose, drejtor i Monitorimit dhe Ankesave, pranë Avokatit të Prokurimeve, thotë se numri i ankimimeve gjatë muajit janar-shkurt 2009 ka qenë i ulët, ndërkohë që fluksi ka nisur gjatë muajit mars e në vazhdim me një numër mesatar prej 60 ankesa në muaj.
Sipas Qoses, ky fakt lidhet edhe me volumin e lartë të investimeve që qeveria ka bërë gjatë këtij viti.
Por nga ana tjetër, aplikimi i procedurës së re të prokurimit elektronik i ka bërë bizneset edhe më konfuze, pasi ata nuk kanë qenë të informuar për këtë mënyrë.
Por një pjesë e shqetësimeve, sipas pretendimeve të biznesit vijnë edhe nga diskriminimi që agjencia bën në përcaktimin e kritereve.
"Ka ankesa të biznesit që thonë se me kriteret e përcaktuara nga Agjencia përpara zhvillimit të tenderit bëhen diskriminime të kompanive", - pohon Qosja.
Sipas biznesit kjo bëhet e qëllimshme për të favorizuar firma të caktuara.
Duke iu referuar të dhënave të Avokatit të Prokurimeve, gjatë vitit të kaluar gjysma e shqetësimeve të biznesit ishin të drejta, por vendimet e këtij institucioni nuk janë tituj ekzekutiv, çka do të thotë që ato mbeten të pazbatuara.
Në seancën e së enjtes parlamenti miratoi ngritjen e një strukture prej 5 anëtarësh e cila do të merret me ankesat e biznesit ndaj tenderave. Ky komision do të luajë rolin e një gjykate administrative.
Por pranë Avokatit të Prokurimeve një numër të posaçëm zënë edhe ankesat e konçesioneve.
Bizneset ankohen për procedura jo korrekte që zbatohen nga Ministria e Ekonomisë.
/r.l/f.sh/NOA/
