Fier, 24 tetor NOA - Izolimi i një 22-vjeçari në Fier duke u mbajtur gjatë i lidhur me zinxhirë, do të kalojë në shqyrtim gjyqësor pasi për këtë është ngritur një akuzë penale.
Burime zyrtare nga Prokuroria e Rrethit Fier, i thanë agjencisë NOA se është hapur një dosje e mbërritur nga strukturat e Komisariatit të Policisë Fier, lidhur me abuzimin ndaj Fatmir Rashos.
Prokuroria sqaroi se për gjyshin e 22-vjeçarit, Kamber Rasho, 79 vjeç, lindur e banues në Levan të Fierit, është ngritur akuza për veprën penale "Heqje e paligjshme e lirisë" parashikuar nga neni 110 i Kodit Penal.
Për shkak të moshës, Kamber Rasho do të ndiqet penalisht në gjendje të lirë, u shprehën burime nga policia dhe Prokuroria në Fier.
Hetimi nisi pak ditë pasi u zbulua se 22-vjeçari Fatmir Rasho nga Levani i Fierit, mbahej i lidhur me zinxhir, në një kasolle që gjendej pranë banesës së gjyshit të tij, Kamber Rasho.
I dyshuari tha se ishte detyruar të ndërmerrte prej afro tre vjetësh këtë masë ndaj nipit të tij, për arsye se ai është i sëmurë mendor dhe shumë agresiv.
r.d/e.r/NOA
