Tiranë, 24 Tetor NOA - Ministria e Ekonomisë, Tregtisë dhe Energjetikës e konsideron si të paligjshëm emërimin e Nikolin jakës në krye të Dhomës së Tregtisë dhe Industrisë.
Burime zyrtare nga METE i thanë mbrëmjen e së shtunës Agjencisë NOA se për këtë dikaster, emërimi i Jakës, një ish-i dënuar për korrupsion, konsiderohet i pavlefshëm.
"Ministria e Ekonomisë, Tregtisë dhe Energjitikës është informuar përmes Sekretarit të Dhomës së Tregtisë dhe Industrisë Tiranë për zgjedhjen e rrufeshme të Kryetarit të ri të Dhomës së Tregtisë, pas dorëheqjes se z. Gjoke Uldedaj, i cili është zgjedhur deputet".
"Në vështrim të parë, përveç ngutjes dhe hapësirave të pakta për të bërë fushatë nga kandidatët rivalë, duket qarte që zgjedhja e Kryetarit të ri bie ndesh me statutin e institucionit, neni nr.6, i cili thotë se asnjë anëtar asambleje nuk mund të zgjidhet nëse është i dënuar me vendim gjykate të formës së prerë për vepra penale", - deklaron METE e drejtuar nga Dritan Prifti.
Dikasteri nënvizon se Nikolin Jaka pretendon se ka fituar pafajësi nga gjykata në lidhje me dënimin dhe burgosjen e tij për vepër penale, por nuk kishte paraqitur përpara asamblesë së Dhomës së Tregtisë Tiranë asnjë dokument që vërteton këtë, kusht i domosdoshëm sipas kërkesave të statutit.
"Â METE është informuar se Prokuroria vazhdon të ndjekë çështjen me Z. Jaka në Gjykatën e Lartë. Ky fakt tregon se pafajësia e Z. Nikolin Jaka nuk është një proces i mbyllur nga gjyqësori", - vijon deklarata e METE-s.
Sipas ministrisë, Zgjedhja e Z. Nikolin Jaka në këtë mënyrë është e pavlefshme sipas rregullave të vetë Statutit të Dhomës së Tregtisë dhe Industrisë Tiranë.
e.r/NOA
