Tiranë, 26 tetor NOA - Këshilli Bashkiak i Tiranës do të mblidhet sot pasdite për të diskutuar mbi disa projektvendime të rëndësishme për qytetarët e kryeqytetit.
Një prej çështjeve është plani rregullues i Tiranës, temë e cila ka shkaktuar mjaft debate në të dyja kampet e politikës.
Ndaj pika më kryesore e debatit duket se do të jetë projektvendimi mbi planin rregullues të Tiranës, i cili sipas axhendës paraprake të Këshillit Bashkiak është vendosur në fund të rendit të ditës të mbledhjes së sotme.
Zëdhënësja e Bashkisë së Tiranës, Valbona Zhupa, i tha agjencisë kombëtare të lajmeve NOA, se diskutimi për planin është caktuar në pikën e fundit të rendit të ditës dhe do të prezantohet nga Drejtori i Punëve Publike në Bashkinë e Tiranës, Dritan Agolli.
Në fokus të diskutimeve do të jenë dhe projektvendime të tjera jo pak të rëndësishme si subvencionimi i kredisë për familjet që e përfitojnë atë, trajtimi me bonos qiraje i familjeve në nevojë.
Gjithashtu një pikë e rëndësishme e diskutimeve në mbledhjen e sotme të Këshillit Bashkiak, do të jetë dhe projektvendimi "Për miratimin e programit buxhetor afat-mesëm për vitet 2010-2012".
m.i/NOA
