Prishtinë, 29 tetor, NOA - Ministria e Punëve të Jashtme të Kosovës nuk është e  kënaqur me nivelin aktual të njohjes së shtetit të ri në arenën ndërkombëtare.
Një fakt të tillë e ka bërë të ditur vetë zv/ministrja e Punëve të Jashtme të Kosovës, Vlora Çitaku, për mediat kosovare, sipas së cilës muajt e fundit nuk janë të kënaqur me njohjet e reja që po fitohen për Kosovën si shtet i pavarur.
Për këtë, ajo ka pohuar se ka ndikuar natyrshëm edhe procesi i hapur ndaj pavarësisë në Gjykatën Ndërkombëtare të Drejtësisë.
"Nuk mund të jemi të kënaqur me dinamikën e muajve të fundit, megjithatë ne kemi vazhduar të bëjmë pjesën tonë të punës, presidenti, kryeministri, dhe ministri i Jashtëm kanë pasur një varg takimesh me përfaqësues të shteteve që nuk e kanë njohur Kosovën dhe ne besojmë që kjo do të rezultojë me njohje. Padyshim që edhe procesi në GJND ka luajtur rolin e vet", ka thënë Çitaku lidhur me një fakt të tillë.
Gjatë këtij viti vetëm 9 shtete e kanë njohur Kosovën, për dallim nga viti i kaluar kur u fituan plot 53 njohje. n.e/NOA
