Tiranë, 30 tetor NOA - Rindizet konflikti mes Sokol Olldashit dhe Edi Ramës për një truall piketuar nga MPPTT për lulishte, ku i pari pretendon se njerëz pranë kryebashkiakut të Tiranës do të ndërtojnë një pallat me shumë kate.
Prej dy ditësh, Ministria e Punëve Publike, Transportit dhe Telekomunikacionit përmes Inspektoratit Ndërtimor Urbanistik Kombëtar po punon për mbylljen e gropës në fillim të rrugës së Kavajës dhe rrugës së Durrësit dhe për shndërrimin e saj në një hapësirë të gjelbër për qytetarët e Tiranës.
Gropa që ka shërbyer deri dje si një vend i rrethuar hedhurinash ndodhet në një truall pronë shtetërore.
"Në mënyrë të paligjshme aty patën filluar përpjekje për ndërtimin e një shumëkatëshi, klient të afërt të kryetarit të Bashkisë, Edi Rama", - deklaroi mbrëmjen e sotme MPPTT, përmes një daljeje për mediat.
Me ndërhyrjen që po bëhet, kjo gropë mbeturinash do të shndërrohet në një hapësirë publike, sikurse u veprua me ish-gropën e Sejdisë prapa Teatrit të Operës që sot është një lulishte në funksion të qytetarëve.
"Prej dy ditësh kryetari i bashkisë po përpiqet me çdo kusht të mbrojë gropën ku parashikon të hedh themelet e një korrupsioni shumëkatësh, gjithsesi kjo është një përpjekje pa vlerë pasi në një kohë rekord Ministria e Punëve Publike, Transportit dhe Telekomunikacionit do t'i japë Tiranës një tjetër hapësirë të gjelbër më shumë", - deklaroi dikasteri i drejtuar nga Sokol Olldashi.
f.sh/NOA
