Tiranë, 4 nëntor NOA - Zyra Qendrore Kombëtare Interpol Tirana ka kryer pasditen e sotme, ekstradimin nga kryeqyteti i Greqisë, Athinë, një shtetas shqiptar të dënuar për burg nën akuzën e vrasjes.
Burime zyrtare policore i thanë Agjencisë NOA se u ekstradua 32-vjeçari Rebani Luan Gjonaj, lindur në Fier.
Ky shtetas ishte shpallur në kërkim ndërkombëtar pasi Gjykata e Rrethit Fier,
me vendimin nr. 247, datë 09.10.2002, e ka dënuar me 23 vjet heqje lirie, për kryerjen e veprës penale të "Vrasjes me paramendim" dhe "Mbajtjes pa leje të armëve të armëve luftarake".
Sipas vendimit të gjykatës, Rebani Gjonaj në datën 07.12.1999, atëherë 22 vjeçar, rreth orës 18:30, në aksin rrugor Fier-Vlorë, në afërsi të disa lokaleve në fshatin Levan, ka vrarë me pistoletë shtetasin Marenglen Zeneli.
Nga hetimi doli se Gjonaj kishte pasur një konflikt kohët e fundit para ngjarjes, për motive të dobëta me viktimën e tij, Marenglen Zeneli.
Si rezultat i bashkëpunimit të Interpol-Tirana me Interpol-Athinën në Greqi në datën 29.08.2005, u bë i mundur arrestimi me qëllim ekstradimi i këtij shtetasi, por ky proces zgjati më shumë se katër vjet.
f.sh/NOA
