Tiranë, 5 nëntor NOA - Një 48-vjeçar është ndjerë keq në banesën e tij dhe familjarët e dërguan menjëherë në ambulancën e lagjes ku ai gjeti vdekjen brenda pak minutash.
Vdekja e 48-vjeçarit ka alarmuar familjarët e tij të cilët kanë nisur t'i bëjnë presion mjekut.
Gjithçka ndodhi dje në ambulancën e Kamzës në Tiranë, kur një mjek ka telefonuar policinë të cilëve i ka raportuar se familjarët e një personi të vdekur po i bëjnë presion.
Burime nga policia thanë për agjencinë e lajmeve NOA se familjarët fillimisht kanë dyshuar se 48-vjeçari Petrit Hyka ka gjetur vdekjen nga neglizhenca e mjekëve ndaj dhe kanë nisur të bëjnë presion.
Ndërkohë që sipas mjekëve, i ndjeri ka mbërritur në ambulancë pa shpresa jete çka ka qenë e pamundur për ta t'i shpëtojnë jetën.
Policia bëri të ditur se vdekja e Hykës ka ardhur nga shkaqe natyrale megjithatë trupi i tij u transportua në morgun e spitalit për ekzaminime të mëtejshme.
k.k/NOA
