Tiranë, 13 Nëntor NOA - Dy vajza, shoqe mes tyre, nuk e kanë duruar dot më dhunën fizike dhe psikologjike që sikundër kanë pohuar, hasnin nga prindërit e tyre, ndaj kanë vendosur të largohen pa lënë gjurmë.
Historia ka prekur familjet e kryefamiljarëve S.J 41 vjeç dhe M. XH., 52 vjeç, që të dy me banim në Kamëz.
Dy burrat kanë shkuar në policinë e Komisariatit nr 5 dhe kanë denoncuar se vajzat e tyre, përkatësisht F.J 15 vjeçe dhe A. A., 14 vjeçe, janë zhdukur prej dy ditësh në drejtim të paditur dhe asgjë nuk dihet për vendndodhjen e tyre.
Burime policore që i konfirmuan lajmin agjencisë NOA, pohuan se për këto dy kallëzime nga dy baballarë të ndryshëm, nisi një hetim intensiv dhe sot është mundësuar gjetja e të dy vajzave.
Adoleshentet, kanë pranuar që të tregojnë për policinë, arsyen e zhdukjes së tyre. Ato kanë deklaruar se janë larguar nga banesat, pasi janë keqtrajtuar nga prindërit e tyre.
Nisur nga ky deklarim i të miturave, policia tha se u bë shoqërimi në Komisariat i prindërve të këtyre vajzave, S.J 41 vjeç dhe M. XH., 52 vjeç.
Ndërkohë, duke vlerësuar si shqetësuese gjendjen e dy të miturave, F.J 15 vjeçe dhe A. A., 14 vjeçe, u plotësua urdhër i menjëhershëm mbrojtjeje ndaj tyre, në bazë të ligjit nr.9669, dt.18.12.2006, për "dhunën në Familje", kurse materialet hetimore, policia tha se do t'i kalojnë Gjykatës, për veprime të mëtejshme.
e.l/NOA
