Prishtinë, 14 nëntor, NOA - Në kuadrin e angazhimeve dhe përgjegjësive që ka Kosova në procesin e integrimit evropian, së shpejti edhe ajo pritet që të ketë institucionin e vet zyrtar që do ta trejtojë atë, pikërisht ministrinë e Integrimit.
Një fakt të tillë e ka bërë me dijeni zv/kryeministri Hajredin Kuçi, sipas të cilit se në vitin 2010 kjo ministria e re pritet të nisë punën e saj. "Kryeministri, në shenjë të angazhimeve për fushën e integrimeve evropiane, ka vendosur që të themelohet një ministri për integrime evropiane. Mendojmë se atë vendim do ta marrë sa më shpejt që është e mundur, në kohën e duhur dhe duke dashur që të koncentrohen punët për integrime evropiane në një vend, por natyrisht edhe të koordinohen nga një vend", ka thënë ai. Për liberalizimin e vizave dhe për integrim në Bashkimin Evropian, Kuçi theksoi nevojën e një përkushtimi më të madh të institucioneve të vendit. Ai shprehu bindjen se me krijimin e Ministrisë për Integrime, do të lehtësohet edhe rruga drejt BE-së. Ndryshe, kohëve të fundit, ka pasur zëra që Ministrinë e Integrimeve do ta drejtojë ish-kryeministri i Kosovës, Bajram Rexhepi. Vetë Rexhepi tha se e vlerëson lart formimin e kësaj ministrie dhe se është në pritje të ftesës për ta drejtuar atë. n.e/NOA
Â
