Nga Milena Selimi
Tiranë, 23 Nëntor NOA - Nuk është e largët thënia se "Shkodra është qyteti i artit dhe shkodranët mbruajtës të tij".
Të parët artistë pamorë si Idromeno e Marubi u bënë një pikë e qëndrueshme dhe referencë artistike për piktorët e talentuar dhe krejt të veçantë prej njëri-tjetrit si Jakup Keraj 1933-1987, Ismail Lulani 1933-2002 e Danish Jukni 1934-2003.
Ata janë tre piktorë të rëndësishëm të historisë së pikturës realiste në Shqipëri.
Është hapur dje në Galerinë e Arteve në Shkodër, ekspozita me vepra të piktorit Danish Jukniu (1934 - 2003), piktorit të guximshëm dhe modernist, që theu kufijtë e artist socialist në telajo.
Ky aktivitet është bashkëpunim i GA-së Shkodër me koleksionin privat "Preval" të Shirazi dhe Aida Kastratit.
Ekspozita përmbledh vepra të fondit të GA-së Shkodër dhe një numër veprash te paekspozuara më parë të autorit Danish Jukniu, pronë e koleksionit të sipërpërmendur.
***
Ai i ka qëndruar kaq pranë pikturës, aspak si akt, por si domosdoshmëri jetike, sa të detyron ta kërkosh për kudo delikatesën e tij artistike.
Nëse ke fatin ta zbulosh, të jep një kënaqësi të mendueshme. Nëse ke fatin ta ndjesh, të rifton të komunikosh me gjithçka që ke zbuluar në pikturën e Danishit dhe për Danishin.
Rasti i artistit Jukniu ishte "Një absurd i veçuar nën një sistem vlerash të përkufizuara qartë nga i ashtuquajturi ‘art i realizmit socialist', ku personazhe si ai në një farë mënyre kishin grumbulluar rreth vetes privilegjin e disa sekreteve të pathëna në zbulim të artit", shprehet për të një nga nxënësit e tij, piktori Vladimir Myrtezai.
Por cila qe filozofia e tij? Myrtezaj kujton se "Në thelb i hapur me një kureshtje të palodhur, me një kulturë të madhe për fenomenet, historinë, popujt dhe kulturat e ndryshme. Një vëmendje të madhe për natyrën, artikulime të ndryshme e kritike për artin. Piktura e tij sot duhet të qëndrojë në pazëllin historic të artit, në majat e epokës që ai jetoi. Kjo racë njerëzish e ka riciklimin të vonë, por nën sepetet e nënndërgjegjes së species ajo krijon nënshtresën e ruajtur me kujdes nga të gjithë ata që luftuan ta zbulojnë qenien dhe jo vetëm tharmin e artit të tij, por dhe vetë modelin e humbur që duhen kohë të tilla absurde për ta rizbuluar".
Ekspozita do të qëndrojë e hapur për publikun deri më 30 nëntor 2009.
m.s/e.r/NOA
Â
