Teheran, 27 nëntor, NOA - Ndërsa 6 vite më parë asaj do t'i akordohej çmimi Nobel për Paqen nga autoritetet e larta të Akademisë së Stokholmit, autoritetet në Iran tashmë ia kanë konfiskuar atë.
Fjala është për aktivisten e njohur iraniane për të drejtat e njeriut, Shirin Ebadi, e cila ka deklaruar se aktualisht ndodhet në Londër dhe se medalja i ishte marrë një kasafortë në Iran para tre javësh.
Nga ana e tij, ministri i jashtëm i Norvegjisë, Jonas Gahr Stoere tha se marrja e medaljes së artë është shokuese dhe ka ndodhur për të parën herë në historinë 108-vjeçare të çmimit që njihet nga e gjithë bota, ndaj ka protestuar ndaj rrëmbimit të çmimit Nobel prej autoriteteve iraniane.
Aktivistja iraniane është femra e parë e besimit mysliman laureate e çmimit dhe gjykatësja e parë në Iran.
Ebadi, duke deklaruar se nuk mund të frikësohet, ka ndezur ndoshta edhe më shumë zemërimin e autoriteteve iraniane, të cilat e kanë keqtrajtuar shumë kohët e fundit, sidomos në protestat masive, që shpërthyen pas rizgjedhjes kontestuese të presidentit Mahmud Ahmadinexhad në qershor të këtij viti.
n.e/NOA
