Nga Milena Selimi
Tiranë, 28 Nëntor NOA - Ka nisur mbrëmë në Tiranë "Albania Fashion Week", aktiviteti tashmë i përvitshëm, që zhvillohet nga Dhoma Kombëtare e Modës Shqiptare.
Aktiviteti mbahet deri nesër më 27-29 nëntor në bukurinë dhe elegancën e ambienteve të hotel Sheraton dhe pretendon të sjellë modelet e reja të veshjeve, realizuar nga stilistë shqiptarë.
Nga informacionet paraprake duket se mungojnë një sërë emrash stilistësh, të cilët tashmë kanë konsoliduar stil, elegancë dhe sharm në veshjet e krijuara.
Nuk janë prezentë Ardi Asllani, Mirela Nurçe, Enada At'Nikolla, Anila Zajmi, etj.
Arsyet e mospjesëmarrjes së tyre, znj. Diana Cekodhima, Presidente e Dhomës Kombëtare të Modës i shpjegon thjesht me "mosarritjen në kohë me koleksionet e stinës'.
Presidentja nuk harron t'u tërheqë vëmendjen stilistëve të njohur për ‘mosangazhim në këtë aktivitet të rëndësishëm të modës shqiptare'.
Duket se edhe fusha e modës ka filluar të ndryshojë rregullat e pranimit, pasi sipas saj 'sivjet prioritet do të kenë emrat e rinj shqiptarë të stilimit.
Studentë të Institutit të Modës "Burgo" do të jenë prezent me punimet e tyre më të mira të veshjeve.
Në këto ditë do të prezantohet Stamatina Stefani, një stiliste e njohur në Greqi.' Stefani shfaq për publikun shqiptar një gamë të gjerë veshjes speciale duke filluar nga ato për fëmijë, tendencat e fundit për moshat rinore, gruan në karrierë, etj.
m.s/e.r/NOA milena.selimi@noa.al
Më shumë foto, te Galeria
