Kryetari i Lëvizjes Socialiste për Integrim, Ilir Meta, i cili mban dhe postet e zëvendëskryeministrit dhe Ministrit të Punëve të Jashtme, tha sot se Kushtetuta do të zbatohet dhe deputetët e PS do të zëvendësohen menjëherë pas skadimit të afatit ligjor që është 7 marsi 2010.
Meta, duke folur në një intervistë për televizionin Alsat, tha sot se deputetët do të merren nga opozita.
Meta deklaroi edhe se incidenti i ndodhur në Pragë ku zhvillohej kongresi i të majtës evropiane, ishte i pazakonshëm dhe i papranueshëm.
Më poshtë vijon intervista e plotë:
Z. Meta, akuzat mes Partisë Socialiste dhe Lëvizjes Socialiste për Integrim tashmë janë bërë pjesë e së përditshmes dhe nuk përbëjnë më lajm, por ajo që ndodhi në Pragë në kongresin e PSE-së nuk është më një lajm kaq i zakonshëm. Së pari, në këndvështrimin tuaj a përbën një incident dhe së dyti, i tejkalon përmasat e përditshmërisë tonë politike?
Natyrisht, në Pragë ndodhën disa gjëra, që nuk do të ishte mirë të kishin ndodhur, aq më tepër në sytë e partnerëve tanë evropianë, pra një lloj transferimi i kësaj mënyrë sjelljeje në Tiranë, atje. Mendoj se nuk është ndonjë habi për të tjerët të mësojnë se kryetari i Partisë Socialiste nuk duron dot kur flasin të tjerët, por ajo që ishte më e rënda, që ishte vërtet një mashtrim i Partisë Socialiste këtu, e cila nxjerr një njoftim të sajin zyrtar nëpër media dhe televizione, sikur ishte miratuar një dokument, një rezolutë, në këtë eveniment, në përkrahje të gjithë kërkesave të PS-së dhe që i bëhej thirrje Kryeministrit dhe koalicionit qeverisës dhe kështu me radhë, gjë që dihet u përgënjeshtrua zyrtarisht nga vet zëdhënësja e Partisë Socialiste Evropiane. Është vërtet për të ardhur keq se si mund të përdoren aktivitete të tilla për të gënjyer dhe për të mashtruar opinionin publik. Kishin shkuar aq larg, sa dukej sikur atje kishin thënë të hapen dhe kutitë, gjë që jo vetëm nuk është e vërtetë, pasi Partia Socialiste Evropiane është një institucion serioz dhe nuk mund të dal kundër institucioneve ndërkombëtare të Bashkimit Evropian. Dihet qëndrimi i këtyre institucioneve për zgjedhjeve. Po ashtu, PSE nuk mund të dali kundër vendimeve të OSBE/ODIHR dhe ka qenë e qartë se të gjitha mesazhet kanë qenë se Parlamenti është vendi ku bëhet debati, Parlamenti është vendi ku shkon opozita demokratike.
Në rast se kryetari i PS-së e ka marrë këtë mbështetje jo hapur, por në biseda konfidenciale, sikurse ndodh të ketë në takime të tilla. A ka të njëjtën vlerë në atë që konsiderohet mbështetje totale, qoftë kjo dhe në formën e një rezolute?
Absolutisht, jo. Deklarata është dokumente zyrtar dhe ka vlerë zyrtare, lexohet nga dikush dhe miratohet, votohet. Nuk ka asnjë dokument të tillë. Ju për këtë mund t'i drejtoheni vet zëdhënëses së Partisë Socialiste Evropiane. Unë nuk mund të marrë përsipër të flas përmes këtij institucioni. Unë mund të them se kjo ka qenë një gënjeshtër dhe se nuk ka asnjë ndërkombëtar, që mund t'u thotë vazhdoni bojkotin, sepse kjo është një marrëzi dhe të jini të sigurt se nuk ka ndërkombëtar që mund të arrij ta kuptojë këtë gjë.
Le të mbetemi përsëri te Praga, duke qenë se është dhe vizita juaj e fundit jo vetëm në kuadrin diplomatik, por edhe si kryetar i Lëvizjes Socialiste për Integrim. Përse u mblodh kongresi i PSE-së dhe cili ishte qëllimi i vizitës tuaj?
Së pari, Lëvizja Socialiste për Integrim ka qenë dhe është gjithnjë e ftuar në aktivitetet e Partisë Socialiste Evropiane, në çdo aktivitet të kongresit, këshillit dhe shumë të tjera. Është një raport tashmë i konsoliduar. Së dyti, ka qenë kongresi i radhës i PSE-së dhe natyrisht në këtë drejtim ka qenë dhe një kongres i përpjekjeve të së majtës evropiane për të rimarrë veten, pas disa rezultateve elektorale aspak të mira në tërësi. Kështu që, do thosha se ishte një kongres për të filluar një moment të ri për të nisur rritjen e rolit të së majtës në Evropë.
Pas incidentit të fundit në Pragë, a mund të thuhet se marrëdhëniet mes PS dhe LSI-ja janë shkëputur përfundimisht dhe kemi një divorc përfundimtar, të paktën për sa kohë krerët janë të njëjtët?
Kjo, për mua, nuk është shumë e rëndësishme, sepse mendoj se deklaratat dhe qëndrimit përjashtuese dhe kategorike ndaj cilitdo dhe çdo force demokratike nuk janë të arsyeshme. Por absolutisht rruga në të cilën ecën kjo forcë politike është një rrugë destruktive. Është një rrugë që nuk i shërben as demokracisë në vend dhe as institucioneve demokratike, as integrimit evropian dhe as rolit në rritje që mund të ketë opozita në këtë proces. Është një rrugë, e cila po asfikson çdolloj qelize demokratike që ka ekzistuar më parë në këtë forcë politike, duke e çuar këtë në drejtime të paditura.
Në momentin që flasim, është krijuar ideja se situata nuk mund të përmirësohet. Duke pasur parasysh retorikën e përdorur nga palët, sipas jush, sa rrezik ka që situata të precipitojë drejt destabilitetit?
Unë jam kundër kësaj retorike, pavarësisht se kush e provokoi më shumë, me veprime destruktive, jo thjesht me retorik dhe këtu kam parasysh lidershipin e PS. Së dyti, duhet të jeni të sigurt ju dhe gjithë të tjerët se nuk ka për të pasur asnjë moment destabilizimi në vend, për arsye sepse çdo gjë funksionon, nuk është ndonjë tragjedi e madhe sepse opozita nuk është në Parlament. Natyrisht që është gjë absurde që në 2009 opozita të mos jetë në Parlament për zgjedhjet, garante e të cilave doli ajo vet, duke marrë përsipër që nga bërja e kodit, administrimi i zgjedhjeve, vendosjen e kamerave, firmosjen e gjithë dokumenteve. Pra, ajo ka qenë garante e këtij procesi, ka qenë jo thjesht bashkëfajtore, por bashkëfajtore kryesore e këtij procesi. Dhe thjesht për tekat për pushtet të një individi, ose një grupi njerëzish, tashmë ka zgjedhur një rrugë, që synon të krijoj një konflikt artificial. Unë mendoj se dhe retorika nga ana e mazhorancës, dhe sidomos e Partisë Demokratike, nuk po ndihmon në këtë proces dhe është shumë e dobishme që të evitohet, pasi, në fund të fundit, ajo që kërkon zoti Rama është një lloj partneriteti në një sherr, ku sherrxhiu është ai vet. Ndërkohë që, ai mund të bëjë protesta sa herë të dojë, kjo nuk shqetëson askënd. Qeveria vazhdon punën dhe duhet të vazhdojë punën dhe duhet të përqendrojë të gjitha energjitë te punët e mëdha që po bënë dhe që do të bëjë, kurse ai vet le të sillet vërdallë zyrës së tij, për sa kohë do të jetë atje.
Zoti Meta, Rama dhe të tjerë e kanë të qartë se kutitë nuk do të hapen? Dhe në gjykimin tuaj, cila është tendenca e vërtetë e kësaj opozite?
Ka vetëm një tendencë të vërtetë, që është destruktiviteti. Destinacionin e lëvizjes që ai po bënë të jeni të sigurt se as ai vet nuk e di?
Përse do të shërbente?
Kjo u shërben thjesht si një mënyrë për të justifikuar humbjen e 28 qershorit. Pra, që ne nuk humbëm, por votat ndoshta u prekën. Gjë që është krejtësisht e pavërtetë në bilancin e gjithë asaj që ka ndodhur me zgjedhjet. Së dyti, gjithë ky veprim destruktiv nuk i duhet për të penguar qeverinë. Nuk ka ça i bënë qeverisë zoti Rama. Kjo i duhet thjesht për të homogjenizuar në mënyrë antidemokratike dhe në një farë mënyrë që po e quajmë "revolucionare", por në kuptimin reaksionar, jo në kuptimin pozitiv të saj Partinë Socialiste. Sepse zhvillimet normale dhe zhvillimet demokratike dhe pjesëmarrja e kësaj partie në këto zhvillime e dobësojnë akoma më tej pozicionin e këtij njeriu në krye të partisë. Sepse ky nuk është në Parlament. Në parlament do shkojnë gjithë të tjerët dhe një pjesë e mirë kanë profilin e tyre politik.
Megjithatë, si mund ta përkufizojmë këtë situatë?
Është një krizë e opozitës, një grip stinor i opozitës.
Mendoni se është i kalueshëm lehtë?
Po do kalohet, se nuk kanë rrugë tjetër.
A do kalohet me vetëkurim, apo duhet t'i ofroni kurën?
Nga që kemi Ministrinë e Shëndetësisë, ndaj na i kërkon ne këtë. Mendoj se mazhoranca ka qenë shumë e hapur për ndihmuar opozitën që të rigjej veten pas humbjes së 28 qershorit dhe ka qenë tepër e hapur dhe mbetet përsëri tepër e hapur, në drejtim të saj që opozita, duke e pasur shumë të vështirë, që për shkak të një lidershipi kapriçioz të pranoj atë që ka ndodhur. Pra, jemi përpjekur t'i jepen disa mundës, disa dritare, për të mundësuar rikthimin e saj në normalitet. Lidhur me transparencën e zgjedhjeve, ju përmendët deklaratën e Berishës se kutitë nuk do të hapen kurrë. Dhe të dojë zoti Berisha, kutitë nuk hapen dot. Nëse zoti Berisha dhe të gjithë ne vendosim diçka të tillë, kjo do të thotë se ne marrim përsipër të zhbëjmë shtetin për një llogari politike afatshkurtër. Nëse ne dalim mbi gjykatat dhe vendosim në Parlament që, për hir të një marrëveshjeje politike të mos marrim në konsideratë faktin që gjykatat janë shprehur për zgjedhjet, për ankimimet dhe numërimet, kjo do të thotë se të njëjtën gjë ne mund ta bëjmë dhe për kriminelët. Nesër kryetari i opozitës, apo dikush tjetër, thotë se unë nuk marrë pjesë në proceset politike, sepse mendoj se filan kriminel duhet liruar, sepse ai nuk është dënuar për vepër penale trafik, a ku di unë çfarë, pra është sepse ka shoqëruar një deputet apo deputete gjatë fushatës dhe jo se ka vratë njerëz, dhe unë nuk vij në Parlament. Pra, nëse kjo përdoret për kutitë kjo mund të bëhet për çdo gjë që ka të bëjë me vendimet e gjykatave. Kjo është logjika dhe askush nuk mund të diskutojë vendimin e gjykatave. E dyta, ne kemi një legjislacion shumë të qartë që komisionet hetimore parlamentare nuk mund të hetojnë çështje me të cilat janë marrë gjykatat, jo vetëm për rastin e zgjedhjeve, por çdo rast tjetër. Ndaj mendoj që qëndrimi i mazhorancës ka qenë jo vetëm kushtetues, por edhe tepër dashamirës, duke u krijuar gjithë mundësitë për të marrë shumicën. Nuk u takon shumica, se si rregull shumica i takon mazhorancës, por kjo është një çështje ku mazhoranca ka lëshuar. Duhan të marrin drejtimin, le ta marrin. Duan të hetojnë për të gjitha pretendimet mbi zgjedhjet, le ta bëjnë, nuk i pengon askush. Por çështja e kutive është një çështje që nuk varen nga mazhoranca dhe as nga Kuvendi, pra është një çështje e mbyllur. Vendime kundër shtetit nuk mund të bëhen, as për kapriçio të Edi Ramës, as të Ilir Metës dhe as të kujtdo tjetër.
Opinioni që qarkullon në radhët e opozitës është se Kushtetuta është ndryshuar dhe shkelur disa herë, pra edhe nëse u shkel dhe një herë, nuk ka problem?
Absolutisht që nuk mund të ecet me këtë logjik. Së dyti, absolutisht që një proces zgjedhor i konfirmuar nga komuniteti ndërkombëtar, ku është bërë e qartë se nuk ka pasur manipulime. Ka pasur probleme në numrin, thuhet në raport, në një të tretën, por po ashtu thuhet se më shumë se gjysma e tyre drejtohej nga opozita. Ka pasur vonesa, sepse çdo fletë është lexuar në kamera. Procesi ka zgjatur 3-4 ditë, ka pasur probleme të funksionimit dhe menaxhimit, por ama asgjëkund nuk thuhet se janë marrë kaq vota, apo janë transferuar kaq vota, sepse nuk ka pasur asnjë kontestim të evidentuar.
Në rast se do të merren frazat e raporteve, ato janë atje, dhe nuk ndryshojnë. Këto janë zgjedhjet më të mira që ka bërë Shqipëria. Këto kanë qenë një progres i dukshëm dhe absolutisht që të realizohen zgjedhje të standardeve më të larta, do të thotë të bësh zgjedhje si të Danimarkës apo të Gjermanisë, duhet të plotësohen dhe disa gjera të tjera që u vunë re gjatë këtyre zgjedhjeve. Për këto, qeveria ka thënë që le ta marrë opozita rolin drejtues të reformës, të bëjë propozime, të bëjë amendamente, ne do t'i votojmë.
Sot pas skadimit të të famshmit ultimatum, nuk kërkohet më thjesht hapja e kutive, por largimi i zotit Berisha?
Hapja e kutive! Kutitë u hapën dje, më duket. U hapën atje te sheshi, në kuptimin politik dhe moral dhe vërtet vjen për të ardhur keq kur mendohet se opozita mendon si të vetmen rrugë të saj të afirmimit atë të bërjes së disa mitingjeve, pa asnjë pikë lezeti dhe motivi, sepse skano motiv realisht, por thjesht bëhen për të krijuar një mistrecllëk në vend dhe për të shqetësuar njerëzit me protestat dhe ultimatume, por s'u bë kjo për tri ditë do bëjmë një gjë tjetër etj. Pra, krijohen situata krejtësisht artificiale, të cilat nuk mbështeten nga qytetarët shqiptarë, çdo gjë duket më së miri, çdo gjë është e sforcuar, e panatyrshme. Edhe vet socialistët janë të irrituar me këtë sjellje mistrece, pasi njerëzit, pavarësisht se e duan apo nuk e duan këtë qeveri, në fund të fundit, votojnë një herë në katër vjet. Njerëzit mund të mobilizohen për zgjedhjet 4-5 muaj para zgjedhjeve, por pjesa tjetër e jetës është pjesa e përditshme. Njerëzit kanë hallet dhe problemet e jetës së tyre dhe nuk e kanë mendjen dhe hallin te mitingjet e njëri apo tjetrit, apo te karrigia e njëri apo tjetrit. Këto kanë kohë kur të vijë 2013-a, njerëzit do mobilizohen do pozicionohen për atë qeveri që duan të mbështetin. Të gjithë sot duan liberalizimin e vizave dhe këtë e tregoi mitingu i jashtëzakonshëm dje në sheshin "Skënderbej". Njerëzit duan që të hapen vendet e punës, sot njerëzit duan që të forcohet shteti ligjor, të luftohet korrupsioni etj. Tashmë është e qartë që këto kërkesa në radhë të parë i kërkohen qeverisë, që ka përgjegjësinë kryesore, por duke i dhënë një mesazh të qartë edhe opozitës, sepse ajo po bën veprime shumë të çuditshme dhe irrituese, sikurse ishte dhe rasti i sjelljes së këtyre plehrave nga periferia për t'i vendosur në bulevard, para Kryeministrisë. Se si mundet ta bëjë këtë gjë, unë s'e kuptoj, opozita sjell lule, nuk sjell plehra. Aq më tepër që dhe kryetari i bashkisë së kryeqytetit është kritikuar për probleme të pastrimit të qytetit. Sfida të tilla nuk i bëhen thjesht Berishës, po i bëhen qytetit dhe qytetarëve, të cilët duan mesazhe të tjera.
Megjithatë, a justifikohet veprimi i forcave blu kundër punonjësve të bashkisë?
Unë nuk e kam ndjekur por mua më vjen shumë keq, por kanë qenë të detyruar. Punonjësit e bashkisë paguhen që plehrat që janë në qytet t'i çojnë në Sharrë dhe jo e kundërta. Është veprim demokratik që të lejosh që thjesht për arsye që të një marrëzie, që mund të ketë kapur disa njerëz, të bëhet pis një qytet i tërë? Kjo është demokracia? Nuk duhet të mendojmë se çdo gjë që do të bëjë dikush është demokratike. Askush nuk e ka penguar opozitën të bëjë protesta, pro nuk është logjike dhe demokratike që të bëhet pis një kryeqytet, thjesht sepse të duket një ide demokratike. Nuk është demokratike, njerëzit duan një qytet të pastër.
Duke u kthyer të pretendimet e opozitës, si mund të arrihet rrëzimi i qeverisë me anë të protestave?
Ky është aksioni më qesharak. Jo vetëm qeveria ka të gjithë mazhorancëm e duhur për të funksionuar shumë normalisht në mënyrë efektive, por absolutisht që pretendime të tilla janë për të gënjyer ata pak njerëz që kanë mbetur në këto mitingjet e lidershipit të PS. Kjo më kujton periudhën '92-'96, kur ne çdo dy muaj jepnim një afat të ri për të rrëzuar qeverinë për të mbajtur njerëzit me shpresë. Neve atëherë dhe na lejohej, se nuk ishim mësuar me rrotacionin e pushtetit, ishte fillimi i demokracisë, absolutisht që në 2009 askujt nuk i lejohet të sillet në mënyrë kaq të papjekur. Politikanët dhe njerëzit e kanë të qartë zgjedhjet bëhen një herë në 4 vjet. I vetmi shans që ka lidershipi aktual i PS-së është që të krijoj një alternativë konstruktive në shërbim të vendit, në rast se nuk do të donte që të dënohej në një mënyrë shumë më kritike në të ardhmen nga qytetarët.
Zoti Meta, këto protesta krijojnë një situatë ngërçi në funksionimin e ekzekutivit shqiptar?
Asnjë lloj shqetësimi dhe ngërçi. Asnjë gjë nuk e pengon qeverinë dhe Parlamentin të funksionojë. Gjithçka që ne kemi dashur e kemi kaluar në parlament. Mund të thoni se ky bojkot ka penguar miratimin e gjykatës administrative. Pavarësisht se ne kemi dëshiruar dhe dëshirojmë që kjo gjë të miratohet sa më shpejt, përsëri edhe duke mos u miratuar kjo gjykatë, gjërat funksionojnë, sepse ka një legjislacion aktual, që i zgjidh këto probleme, pavarësisht se na marrin më shumë kohë. Shqipëria nuk është në një situatë problematike me boshllëqe në legjislacion. Të gjitha ligjet e rëndësishme tashmë janë miratuar, këtu ka probleme që kanë të bëjnë me aftësitë ligjzbatuese dhe qeveria këtu do të përqendrohet. Pra, në zbatimin e ligjeve, që janë miratuar deri më tani. Këto janë pretendime absurde. Natyrisht, që nuk është normale që opozita të mos jetë në Parlament, opozita është që të jenë në parlament, sepse nuk mund të bëhet në rrugë. Por, kjo është një zgjedhje e lidershipit të saj dhe jo e mazhorancës. Problemi është i formimit jo demokratik të lidershipit të kësaj opozite dhe iluzioneve se pushteti mund të merrej me ca mitingje dhe ultimatume.
Opozita ka shtrirë aktivitetin dhe në fusha të tjera, duke shfrytëzuar pakënaqësitë e kategorive sociale. Sa mund të ngjizet kjo lëvizje në një krizë sociale?
E vetmja krizë në Shqipëri është mosfunksionimi i pushtetit vendor, atje ku drejtojnë kryetarët e PS-së, pasi të gjithë resurset e këtij pushteti janë vendosur pikërisht jo në funksion të shërbimit të qytetarëve, por të tensionimit artificial të situatës në vend. Po bëhen shpërdorime të jashtëzakonshme të burimeve financiare dhe të gjithë logjistikës që administrojnë këto bashki apo komuna. Natyrisht ka përjashtime, por nuk shikojë asnjë lloj krize sociale, ekonomike apo politike në vend, përveç kizës së lidershipit të opozitës, por që jam i bindur se do të zgjidhet nga vet opozita.
Kryeministri Berisha vazhdimisht është takuar dhe takohet me drejtuesit e bashkive të PS-së në rrethe. Kjo është një gjë jo thjesht e dëgjuar, por është një gjë në të cilën unë kam qenë prezent apo në dijeni. Natyrisht që dialogu do dy palë dhe është për të ardhur keq që kreu i bashkisë së Tiranës e gjen më të lehtë që t'i mbledhë kryebashkiakët para Kryeministrisë, poshtë zyrës së Kryeministrit Berisha dhe të mbajë fjalime pa fund, ndërkohë që e ka shumë më të thjeshtë që të takohet me zotin Berisha. Por, problemet që ata paraqesin ekzistojnë në mënyra të kundërta, pra duke mos pasur një problem të qenësishëm, ata i shmangen dialogut dhe duan të krijojnë situata artificiale, që këtu ka probleme të mëdha. Pra, nuk vullnet nga kreu i PS-së për të dialoguar.
Si e komentoni gjuhën e përdorur nga Berisha dhe vendimin e policisë për të prishur pallatin e një të afërmi të deputetit të PS?
Dua të theksoj se jam kundër ballafaqimit të retorikave, pavarësisht substancave, qoftë edhe pozitive, që ato mund të kishin, aq më tepër mendoj se në këtë situatë okupimi i opozitës është të provokoj tension artificial absolutisht mazhoranca duhet ta neglizhoj këtë frymë tensioni dhe replikash të panevojshme. Është e papranueshme që të përdoren etiketime të ndryshme, apo çështje personale dhe familjare. Kohët e fundit kemi vënë re që më të drejtë zoti Rama e ngre këtë preokupim, duke dashur të viktimizohet nga sulmet dhe akuzat. Mirëpo, kjo nuk mjafton se në radhë të parë orkestruesi i gjithë sulmeve personale dhe familjare ka qenë zoti Rama, jo vetëm ndaj zotit Berisha dhe familjes së tij, por edhe në përgjithësi edhe të politikanëve të tjerë, gjë që është shumë e gabuar. Nuk mund të përdori një politikan standarde të dyfishta, pra unë kam të drejtë t'ju shaj, t'ju përmend çdo gjë, madje dhe jo gjëra të vërteta, ndërsa nuk pranoj që të më përmendni gjëra edhe të vërteta. Unë mendoj se çështjet e planit personal duhet të shmangen. Këto janë çështje që i gjykon vet publiku, sepse jetojmë në një vend modest, ku nuk kalon asgjë pa u marrë vesh. Ndaj duhet të përqendrohemi në çështje më të rëndësishme.
Në rastin konkret, unë nuk e di çfarë ka ndodhur te pallati 12-katësh që thoni ju, pasi dhe nuk kam qenë këtu. Por, duhet të keni parasysh se çdo veprim, që synon zbatimin e ligjit, duhet vlerësuar dhe duhet mbështetur. Kjo gjë nuk duhet bërë as në mënyrë selektive, përkundrazi duhet të bëhet për të gjithë njëlloj, në këtë mënyrë as nuk mund të përdoret për mbrojtje politike. Domethënë që po bëhet kjo gjë, sepse ky është miku i këtij dhe goditet për arsye politike. Absolutisht mbi gjithçka ligji duhet të fitojë dhe duhet të sfidojë antiligjin. Nuk është mirë që lidershipi i PS-së, në vend që të merret me mbrojtjen e interesave të qytetarëve shqiptarë në tërësi, të cilët gjithnjë kanë nevojë të përfaqësohen nga opozita, flas për ata që nuk ndjehen të përfaqësuar nga mazhoranca, po i harxhon energjitë në mbrojtje të interesave të disa individëve, që janë të lidhur nga ana shoqërore dhe morale me kryetarin e tyre. Po kalohet në një opozitë, që është në mbrojtje të interesave të ngushta.
Për zgjidhjen e krizës mungon një negociatori apo kompromisi?
Mendoj se kompromisi është ofruar. Sot kërkohet që lidershipi i PS të kuptojë që sa më shpejt të braktisi këtë pozicion destruktiv, aq më mirë është edhe për të, por edhe për atë alternativë që opozita duhet të përfaqësoj për një vend demokratik.
Mundësia e djegies së mandateve të PS-së është një kërcënim apo. . . ?
Ç'do të thotë djegie mandatesh?
Zëvendësim është njëlloj. . .
Jo, kjo është tjetër gjë dhe është e parashikuar në Kushtetutë. Ata opozitë do jenë prapë, nuk do merren nga PD-ja, LSI-ja, a ku di unë, ata nga opozita do merren. Nuk mund të ketë asnjë zgjidhje jashtë konceptit dhe frymës kushtetues. Por, absolutisht nëse këta deputetë që janë sot nuk duan të shkojnë në Parlament për njëmijenjë arsye, kjo nuk do të thotë se duhet të shkelet Kushtetuta. Kjo çështje do zgjidhet në mënyrë kushtetuese. Nëse ata nuk duan të vijnë në Parlament, le të dalin malit. Ne jemi në një vend anëtar të NATO-s, jemi në një vend që pret t'i vijë pyetësori dhe përgatitet për negociata me BE, ata duan të mos hyjnë në Kuvend, po le të dalin malit, çfarë t'u bëjmë ne. Më mirë të protestojnë atje sesa te Kryeministria, sepse mërzisin dhe njerëzit. Ata kanë marrë mandatin për të shkuar në Parlament.
Ata e kanë gjetur zgjidhjen do të hyjnë në Kuvend për të bërë betimin dhe do dalin prapë?
Më thuaj, çfarë është kjo? Ky është një karagjozllëk i madh. Le të bëjnë ç'të duan, njerëzit po i shikojnë, po i gjykojnë dhe do i vlerësojnë. Mitingu madhështor i djeshëm ishte më shumë se shprehje e aspiratave të vendit, ishte një qëndrim për të mos u kthyer mbrapa në një rrugë ku do t'i fus lidershipi aktual i PS-së. Askush të mos ketë iluzione se zgjedhjet do të jenë më parë sesa 28 qershori i vitit 2013. Nuk do të jenë asnjë vit më parë dhe as më pas, sepse zgjedhjet janë bërë traditë. Kushdo mund të bëjë çfarë të dojë, por askush të mos harrojë se jemi të monitoruar nga qytetarët shqiptarë.
FUND
