Reagon qeveria: Ka ndodhur një defekt i rëndë, prej dy ditësh nuk ka ujë
Fier, 11 Dhjetor NOA - Qyteti i Fierit nga mëngjesi i djeshëm ora 09.00, është zhytur në mungesë totale të ujit dhe në asnjë çezmë të familjeve në këtë qytet nuk furnizohet me lëngun e jetës. Lajmin e bën të ditur korrespondenti i agjencisë NOA në Fier dhe konfirmohet edhe nga Drejtoria e Përgjithshme e Ujësjellës-Kanalizimeve e cila i tha NOA-s se defekti ka ndodhur të Enjten rreth orës 09:00.
"Defekti i rëndë ka ndodhur në tubacionin kryesor që furnizon me ujë qytetin e Fierit nga pus shpimet Kafaraj dhe si pasojë nuk është bërë i mundur furnizimi me ujë i banorëve të qytetit të Fierit", - deklaruan burime zyrtare nga Drejtoria e Përgjithshme e Ujësjellës-Kanalizimeve.
E gjendur në këtë situatë Sh.a Ujësjellës Fier, ka kërkuar ndihmë dhe pohoi se ka gjetur mbështetje nga Ministria e Punëve Publike, Transportit dhe Telekomunikacionit për të bërë të mundur të përfundojë riparimin e këtij defekti.
Stacioni i pompimit pritet të fillojë nga puna në orët e para të ditës së Shtunë, ndërkohë që furnizimi me ujë i banorëve të Fierit dhe zonës përreth, pritet të bëhet i mundur në mëngjes, si pasojë e kohës së domosdoshme për testimin dhe presimin e rrjetit nga linja kryesore, depo dhe rrjeti shpërndarës.
e.b/r.l/NOA
