Tiranë, 12 Dhjetor, NOA - Nga dita e hënë 14 Dhjetor, Partia Socialiste së bashku me opozitën e bashkuar qytetare do të organizojë në të gjithë vendin një valë protestash popullore për t'i treguar Sali Berishës, kryeministrit të votave të vjedhura e kutive të mbyllura, se qytetarët duan zgjidhje për krizën ekonomike dhe mbrojtje për bizneset e tyre. Pohimin e bëri para disa minutash, deputeti socialist Blendi Klosi në një dalje për mediat.
Ai njoftoi se të hënën 14 dhjetor fillon me Durrësin protesta njëjavore për krizën e demokracisë e të ekonomisë së familjeve shqiptare.
"Ne do të protestojmë në Durrës për të gjitha pasojat e kutive të mbyllura, që nga rritja e çmimit të energjisë apo vizitave në spital, ngritjes se TEC-it famëkeq me qymyr te Zi,
tek mosliberalizimi i vizave edhe për Shqipërinë bashkë me Serbinë, Malin e Zi e Maqedoninë", - tha Klosi.
Ai theksoi edhe se të hënën 14 dhjetor në Durrës do të protestohet "për shkeljen e autonomisë vendore dhe prerjen e fondeve për qytetin nga kjo qeveri ilegjitime".
Por vuri në dukje sidomos se protesta zhvillohet "për liri e të drejta që kërcënohen përditë nga ky pushtet që grabiti votat për të grabitur Shqipërinë".
Klosi lajmëroi edhe se vala e re njëjavore e protestave që nis me qytetin bregdetar për të përfunduar në Tiranë, do të jetë e fundit për këtë vit, por duke i lënë vend një vale tub re në janar:
"Java e ardhshme do të jetë ura që do të lidhë protestat që lamë pas me protestat që do të rifillojnë edhe me fuqishëm pas Vitit të Ri".
e.r/NOA
