Gjirokastër, 30 dhjetor NOA - Një aksident me pasojë vdekjen e një 30-vjeçari ka ndodhur sot në aksin rrugor Sofratik-Libohovë.
Ngjarja ndodhi paraditen e sotme në aksin rrugor Sofratik-Libohovë, në vendin e quajtur Kolektor 2, mbi një urë kur automjetit tip-Benz kamion me traga  GJ 9017 A, që drejtohej nga 55-vjeçari Roland Mushi është përplasur me një automjet tip -Fiat Punto me targa greke YOY 52 89, që drejtohej nga 30-vjeçari Elton Musai, lindur dhe banues në Elbasan.
Si pasojë e përplasjes, të dy automjetet kanë rënë në kanal me ujë, ku automjeti tip- Benz Kamion ka rënë mbi automjetin tip- Fiat Punto dhe për pasojë ka gjetur vdekjen e menjëhershme 30-vjeçari Elton Musai drejtuesi i automjetit tip Fiat Punto.
Ndërsa 55-vjeçari është plagosur dhe është transportuar menjëherë në Spitalin rajonal në Gjirokastër për të marrë ndihmën e parë mjekësore, ku nga të dhënat e marra nga spitali mësohet se është jashtë rrezikut për jetën.
Grupi hetimor pasi kreu këqyrjen e vendit të ngjarjes, konstatoi se automjeti tip Benz Kamion lëvizte për në drejtim të fshatit Nepravishtë ndërsa automjetit tip Fiat Punto lëvizte për në drejtim të Sofratikës.
Shkaku i këtij aksidenti është shkelja e rregullave të qarkullimit rrugor, shpejtësi dhe mos mbajtja e krahut nga ana e 55-vjeçarit i cili pas marrjes së ndihmës së parë mjekësore, që sipas deklarimit të mjekut s'ka asnjë rrezik për jetën do shoqërohet në Komisariatin e Policisë Gjirokastër për veprime të mëtejshme.
k.k/NOA
