Tiranë, 19 janar NOA - Masakron gruan me të cilën bashkëjetonte, arrestohet nga policia një 54-vjeçar.
Specialistët e seksionit Kundër Krimeve ndaj Jetës dhe Shëndetit pranë policisë së Tiranës arrestuan ditën e djeshme 54-vjeçarin Ilir Drini. Arrestimi i tij u krye sepse më datë 14 janar 2010, dyshohet se për motive të dobëta, ka dëmtuar rëndë në pjesë të ndryshme të trupit 40-vjeçaren Amarda Hanku, e cila aktualisht ndodhet e shtruar në Spitalin Ushtarak Tiranë. Nga hetimet e kryera nga policia rezulton se autori dhe e dëmtuara bashkëjetonin prej rreth 1-viti.
Sipas dëshmisë së 40-vjeçares, është dhunuar prej burrit në mënyrë të përsëritur gjatë kohës që jetonin sëbashku. Gjatë kontrollit të ushtruar në banesë u sekuestruan në cilësinë e provës materiale 4 pasaporta me gjeneralitete të ndryshme që nuk i përkasin këtij shtetasi, për të cilat do të bëhen ekzaminimet përkatëse.
Materialet do t'i kalojnë Prokurorisë, për veprën penale të "plagosjes së rëndë me dashje".
k.k/NOA
