Skandal në stadium me Realin e Madridit
Ndeshja, minutë pas minute
MTKRS: Blackout, shkaktar ishte OSSH
Konfirmohet se "janë shoqëruar në ambientet e policisë, punonjës të Qendrës Sportive SH.A si dhe punonjës të OSSH, të cilët po pyeten në lidhje me shkaqet e ndërprerjes së energjisë elektrike në stadium teksa luhej ndeshja Gramozi i Ersekës dhe Real i Madridit"
Tiranë, 21 Janar NOA -
Nisin zyrtarisht hetimet, në lidhje me incidentin e krijuar në stadiumin Kombëtar "Qemal Stafa" Tiranë, si pasojë e ndërprerjes së energjisë elektrike gjatë zhvillimit të ndeshjes miqësore të futbollit ndërmjet ekipeve Gramozi i Ersekës dhe Real i Madridit.
Lajmi konfirmohet për agjencinë NOA nga Drejtoria e Policisë së Qarku Tiranë e cila tha në orët e para të së Enjtes se për sqarimin e rrethanave të ngjarjes është formuar një grup hetimor i përbërë nga oficerë të Policisë Gjyqësore, Ekspert Kriminalist dhe Ekspertë të tjerë, i cili po kryen hetimet e nevojshme në vendin e ngjarjes.
Deri tani, është kryer një këqyrje e pjesshme e vendit të ngjarjes, këqyrje e cila do të vazhdojë ditën e sotme më datë 21 janar 2010.
Konfirmohet se janë shoqëruar në ambientet e policisë, punonjës të Qendrës Sportive SH.A si dhe punonjës të OSSH, të cilët po pyeten në lidhje me shkaqet e ndërprerjes së energjisë elektrike në stadium.
Policia tha se është bërë e mundur, sekuestrimi i të gjithë dokumentacionit përkatës dhe i korrespondencës mbi organizimin e kësaj ndeshjeje.
Ndërkohë që është informuar, Prokurori i Rrethit Gjyqësor Tiranë. Policia tha se mbi ecurinë e hetimit për këtë ngjarje, do të ketë informacion të mëtejshëm.
Më herët, Ministri i Turizmit, Kulturës, Rinisë dhe Sporteve, Ferdinand Xhaferraj, zbardhi publikisht një dokument që tha se provon fajësinë e Operatorit të Sistemit të Shpërndarjes OSSH në skandalin e ndërprerjes së energjisë elektrike.
Për më shumë mbi akuzat e Xhaferrajt dhe dokumentin, klikoni këtu: MTKRS: Blackout, shkaktar ishte OSSH.
Raportin e plotë lidhur me ngjarjen mund ta gjeni këtu.
Kurse mund të gjeni dhe informacionin për ndeshjen, minutë pas minute.
e.r/NOA
