Tiranë, 23 Janar NOA - "Interesi i shqiptarëve, nuk është të privojnë veten nga mirësitë e energjisë bërthamore, sepse kjo energji është provuar dhe faktuar si jashtëzakonisht e dobishme për vende shumë të zhvilluara. Është burimi më konstant, më i pasur i energjisë. Përse shqiptarët u dashka që për hir të konotacioneve globaliste të përjashtohen nga ky burim? Absolutisht jo".
Ky ishte shpjegimi që bëri kryeministri Sali Berisha në një intervistë televizive që ka dhënë për Ntv, të cilën më poshtë e gjeni të zbardhur të plotë.
Më poshtë vijon intervista e plotë:
Zoti Kryeministër, duke qenë se jeni shprehur se në Shqipëri nuk ka luftë politike, po e filloj me atë që ka njëfarë paralajmërimi të BB-së që këtë vit mund të ketë krizë ekonomike.
Banka Botërore, ashtu siç keni pasur rastin ta dëgjoni nga Zëvendëspresidenti i saj për Europën dhe Azinë, përbën një shembull suksesi dhe një histori të vërtetë suksesi në rrafshin ekonomik. Ka një parashikim që mund të ketë, në rrafshin ndërkombëtar, një valë të dytë rënieje ekonomike. Por, në rast se do të kemi parasysh parashikimin e një viti më parë, ai nuk doli. Parashikohej një vit më parë se rimarrja ekonomike do të mund të fillonte nga mesi dhe fundi i vitit 2010. Në të vërtetë, rimarrja ekonomike filloi nga mesi i vitit 2009 dhe gjysmën e dytë të vitit. Pra, unë personalisht nuk them se do të jetë një vit i artë, por nuk parashoh dhe nuk e shoh me pesimizëm këtë vit, por shoh një vit të mbarë për ekonominë shqiptare. Unë mund t'ju them se interesi i institucioneve të mëdha financiare private, europiane dhe botërore, për të investuar në ekonominë shqiptare dhe besimi i tyre është shumë i madh.
Ju jeni një politikan optimist dhe sapo u shprehët se nuk e shikoni me pesimizëm situatën ekonomike. Megjithatë, a mund të flitet se në vitin 2010 do të ketë të njëjtën rritje apo stabilitet ekonomik si në vitin 2009, të paktën, sipas mediave, qeveria shqiptare po tenton për borxhe, gjë e cila deri më sot më duket e pamundur?
Nëse bëjmë listimin e qeverive përsa i përket borxheve, mund të jenë maksimumi 5-7 për qind në nivel planetar që nuk marrin borxh për buxhetin e tyre. Por varet shkalla e borxhit që merr. P.sh. sot në Europë ka qeveri që planifikojnë të marrin 12 për qind të Prodhimit të Brendshëm borxh për këtë vit. Qeveria shqiptare parashikon një borxh prej 4.2 për qind. Borxh, i cili është i përvitshëm, por me tendencë uljeje. Unë e konsideroj për këto vite një nga nivelet më të ulëta të borxhit.
Është tjetër gjë nevoja për borxh dhe gatishmëria për t'i dhënë borxh qeverisë shqiptare.
Në fakt gatishmëria është e plotë, absolute. Siç u dha vitin e kaluar, në kulmin e krizës, qeverisë shqiptare iu dha borxh. Qeveria shqiptare ka një ekonomi të shëndoshë dhe ndaj i jepet borxh. Këtë vit është akoma më e madhe gatishmëria dhe në kushte shumë më të leverdishme.
A ka nevojë për rishikim buxheti i vitit 2010? A ka nevojë për ngushtim të këtij buxheti?
Po e ndjekim. Ne synojmë të ruajmë parametrat dhe në krizë detyrohesh që sigurisht të zgjerosh deficitin buxhetor, do rrisësh borxhin, me veprime të cilat i ndërmerr. Po marr qeverinë greke. Qeveria greke do të ketë këtë vit një deficit buxhetor prej 12 për qind të GDP-së, një borxh prej 100 e ca për qind të GDP-së, rreth 108 për qind. Por është zotuar se në vitin 2013 do ta ulë në 2.8 për qind borxhin. Pra, në momente të caktuara qeveritë janë të detyruara të zgjerojnë deficitin dhe të rrisin borxhin. Tendenca e qeverive, në tërësi, është që të ecin drejt uljes. Në rast se ne ndërhyjnë, nuk është e sigurt kjo, por në rast se ne ndërhyjmë, do të ndërhyjmë në kushte të favorshme, në mënyrë që të konsolidojmë më tej stabilitetin ekonomik.
Mediat kanë shkruar se qeveria shqiptare sivjet nuk parashikon rritje pagash...
Absolutisht kjo është e pavërtetë. Qeveria shqiptare ka parashikuar rritjen më të madhe të pagave në historinë e vet, këtë vit. Absolutisht, pavarësisht rishikimit të buxhetit, pagat nuk preken, pensionet nuk preken. Ne jemi qeveria që kemi rritur më shumë pagat në Europë, gjatë katër viteve që shkuan. Sërish do t'i rrisim. Unë besoj se investimi në kapitalin njerëzor, në burime njerëzore është investime më i mirë. Në këtë kontekst, sa të jem në pushtet, unë nuk do të pushoj, nuk do të tërhiqem së rrituri pagat dhe pensionet. Pensionet rriten si një detyrim ndaj atyre njerëzve, të cilët kanë shkrirë jetën e tyre, energjitë e tyre, në një sistem absurd në kuptimin më absolut të fjalës dhe më vjen keq që, sado që t'ua rritësh, nuk është se ti u jep mundësi atyre që të bëjnë jetën që ata meritojnë.
Kjo është dëshira dhe koncepti juaj mbi pagat zoti Kryeministër, por mundësia e financave të qeverisë shqiptare a është e plotë?
Është e plotë. Dëshira ime bazohet mbi mundësinë e plotë. Me pagat nuk luhet, por, edhe nëse nuk ke mundësi, sigurisht që nuk mund të thuash që do t'i rris. Por që ne do t'i rrisim pagat patjetër.
Numri dy i BB-së në fakt i ka kërkuar ndjesë publike qeverisë shqiptare. Është hera e parë që kërkohet ndjesë ndaj një qeverie. Me çfarë instrumentesh keni detyruar BB-në të kërkojë ndjesë publike?
Absolutisht, midis partnerëve ka vetëm një rregull bazë, marrëdhënie transparente. Gabojmë ne, kërkojmë ndjesë dhe kjo ndodh rëndom. Askush nuk del jashtë teorisë së gabimit. Të tilla janë marrëdhëniet. E rëndësishme është që në marrëdhëniet midis Shqipërisë dhe BB-së, midis Shqipërisë dhe FMN-së, në marrëdhëniet mes Shqipërisë dhe Komisionit Europian, Shqipërisë dhe vendeve mike, ekziston gjithnjë transparenca. Nuk ka gjë të mbyllur, të errët. Jashtë teorisë së gabimeve nuk del kërrkush, asnjeri. Qeveria shqiptare, në rast se gabon, i pari që kërkon ndjesë është Kryeministri. Partnerët e tjerë, në rast se vlerësojnë ndonjë diçka jo në mënyrë objektive, kërkojnë ndjesë. Kjo është një praktikë midis institucioneve të bazuara në vlera.
Po flasim për raporte reciproke me partnerët ndërkombëtarë. A ka qenë më e vështirë në mandatin e parë, po flasim për vitet ‘92-‘97, për të vendosur raporte reciproke me faktorin ndërkombëtar?
Shqipëria në vitin ‘92 - ‘96 kishte një objektiv kryesor në politikën e jashtëm, hapjen, sepse Shqipëria dilte nga bunkeri. Në këtë kontekst, ajo ishte një politikë hapjeje, ishte një politikë, si të thuash, ajo u thoshte mirëdita apo mirëmëngjesi partnerëve ndërkombëtarë, kundër të cilëve Shqipëria kishte derdhur me dekada tonelata sharjesh, shpifjesh, trillimesh. Nuk mund të them se ishte një politikë e jashtme me shumë se hapje. Kishte pastaj edhe elementët e bashkëpunimit me disa vende të caktuara. Por Shqipëria sot është një Shqipëri krejt tjetër, është një Shqipëri e strukturuar në procese integruese, është anëtare e NATO-s, po punon për kandidaturën për në BE. Pra, është një Shqipëri krejtësisht tjetër.
Shumë herë, iniciativat dhe deklaratat tuaja, opozita, ndoshta edhe mediat, i kanë menduar si lëvizje për të spostuar vëmendjen. Po i rikthehem idesë së centralit bërthamor të hedhur dy ditë më parë, që tashmë e keni kthyer në vendim në Shqipëri. Realisht a e shihni si të mundur në Shqipëri?
Unë jam Kryeministër dhe unë, së pari, duhet të përcaktoj interesat publike të shqiptarëve. Për mua, dhe unë kam bindjen e thellë, edhe interesi i shqiptarëve, nuk është të privojnë veten nga mirësitë e energjisë bërthamore, sepse kjo energji është provuar dhe faktuar si jashtëzakonisht e dobishme për vende shumë të zhvilluara siç është Franca, që mbi 60 për qind të energjisë që konsumon e nxjerr nga centralet bërthamore dhe Franca është një vend me burime enorme, me lumenj të mëdhenj, me burime shumë të mëdha energjie të rinovueshme. Por Franca 63 për qind të energjisë e ka nga centralet bërthamore. Centralet bërthamore po rikthehen në një seri vendesh, në Britaninë e Madhe, në Finlandë, në Bullgari, Rumani. Pra, është burimi më konstant, më i pasur i energjisë. Përse shqiptarët u dashka që për hir të konotacioneve globaliste të përjashtohen nga ky burim? Absolutisht jo. Historia e energjisë është e tilla, në një treg që ndoshta do t'i duhen dekada ose shekuj për t'u plotësuar dhe që ndoshta nuk do të plotësohet ndonjëherë. Sepse energjia shkon, ndjek rritjen. Mirëpo ne jemi në kohërat e rritjes së madhe ekonomike. Në rast se rritja ekonomike para shekullit të 20-të, në rreth 800 vite të marra, rritja ka qenë një rritje që luhatej nga 1 në 2 për qind, ose minus, çka bëri që njerëzimin ta shoqërojë një mijëvjeçar varfërie dhe vetëm varfërie. Ky kapitull është mbyllur në shekullin e 20-të. Shekulli i 20-të është shekulli i rritjeve të mëdha ekonomike. Imagjinoni çfarë rritje ka Kina me 8-10-12-13. Po kështu ka filluar të rritet India. Pra, jemi në një kohë, ku energjia, pa diskutim, mbetet tregu më i rëndësishëm për t'u plotësuar. Shqipëria duhet të shfrytëzojë të gjitha potencialet, të gjitha format e energjisë. A do të ndërtohet central bërthamor në Shqipëri apo jo, ky nuk është përcaktim i imi, sepse këtë do ta përcaktojnë ekspertët. Në qoftë se ekspertët do të thonë se centrali është i mundshëm, pasi ato kanë disa kushte, p.sh e morën e thanë në Shkodër, është marrëzi, nuk mund të ndërtohet në afërsi të një qendre apo një qyteti, kjo është absurde. Por, në rast se ekspertët përcaktojnë vendin e sigurt për ndërtimin e tij në Shqipëri, unë absolutisht jam dakord që nesër. Në rast se ekspertët thonë se duhet të përzgjidhet një vend më i mirë, do të punojmë për një projekt rajonal, ku do të përfshihen edhe vende të tjera. Por vendimi i djeshëm, është vendimi i përgatitjes së Agjencisë, e cila në bashkëpunim me Agjencinë Ndërkombëtare të Energjisë Atomike, do të përgatisë të gjithë infrastrukturën ligjore të shfrytëzimit të energjisë bërthamore për qëllime paqësore nga Shqipëria.
Ju sapo hodhët poshtë akuzat se ky central ishte vendosur të ndërtohej në Shkodër. Megjithatë, kur keni dhënë idenë se Shqipëria ka nevojë apo mund të ketë një central bërthamor, në mendjen tuaj keni pasur një vend se ku mund të ndërtohet ai.
Sinqerisht jo, sepse unë nuk njoh kushtet e kërkuara gjeografike apo të tjera të ndërtimit të një centrali bërthamor. Nuk jam ekspert në fushë. Unë përcaktoj parimin që Shqipëria duhet të përfitojë nga energjia bërthamore, si burimi më konstant dhe më i pasur i energjisë elektrike.
Folët pak më parë se shqiptarët nuk mund të privohen nga mirësitë e energjisë bërthamore. Megjithatë, edhe vendet e rajonit kanë nevojë për këtë energji, por deri më sot nuk e dimë të kenë ose të ndërtojnë të tilla. Përse Shqipëria e para këtë ide?
Bullgaria e ka një dhe po ndërton një tjetër central bërthamor. Rumania po ndërton një central bërthamor shumë të madh. Kroacia e Sllovenia kanë një të përbashkët. Qeveria kroate tregoi gatishmëri të plotë që ta ndërtonim një së bashku. Pra, nga vendet e rajonit, 4 prej tyre kanë, disponojnë dhe ato absolutisht kanë përfituar prej tyre. Bullgaria dhe Rumania janë eksportues të rëndësishëm të energjisë. Bullgaria mbylli një të tillë, sepse e kishte me teknologji Çernobili, por vendosi menjëherë të ndërtojë tjetrin, me teknologji më të avancuar dhe me masa sigurie më të mëdha. Nuk shoh në mënyrë absolute asnjë problem për centralet bërthamore. Ato janë shumë të sigurta. Ato që ndodhën, ndodhën në Çernobil dhe ajo është një teknologji thellësisht e tejkaluar.
Meqenëse 4 vende të rajonit e kanë zgjidhur këtë problem, me çfarë financimesh apo me cilat vende të rajonit mund ta ndërtoni atë në Shqipëri?
Shumë e drejtë. Ka dy mënyra. Së pari mund të jetë iniciativë private dhe konsorciumi kërkon nga Shqipëria që t'i blihet energjia, apo nga Kroacia, apo shtetet përreth. Së dyti, shtetet tona, Shqipëria, Maqedonia, Kosova, Mali i Zi, Kroacia, së bashku, mund të përballojnë pa asnjë dhimbje koke ndërtimin e një centrali bërthamor, nga i cili të marrin energji në proporcion me kontributin e tyre. Nuk është e pamundur kjo, vendet po ecin drejt zhvillimit.
Meqenëse ju iu referuat pak më parë ekspertëve që duhet të flasin, pikërisht ekspertët apo ish-Akademia e Shkencave ka akuzuar qeverinë shqiptare para dy ditësh se prej saj ndodhi apo që ndodhi në Shkodër.
Këto janë marrëzira. Përse pikërisht këta që paskan thënë kështu nuk e parandaluan përmbytjen në vitin 2004, përse këta zotërinj nuk e parandaluan në vitet ‘60-‘61, përse nuk e parandaluan Kirin në vitet ‘71 kur humbi jetën edhe kryetari i Komitetit Ekzekutiv? Reforma e Akademisë është një nga reformat më të rëndësishme që kemi bërë ne, sepse varianti i saj ishte një variant jashtë kohe, ishte trashëgimi e një forme totalisht false, një akademizëm shterpë dhe në këtë drejtim, nuk kemi bërë asgjë tjetër veç hapat e para. Kemi çuar kërkimin shkencor pranë universiteteve. Aty dhe vetëm historia e zhvillimit të shkencave fakton se mund të gëlojnë hulumtimet dhe kërkimet shkencore, me suksesin më të madh. Kam njohur njëherë një akademik francez, i cili shkonte shpesh në Bashkimin Sovjetik. E pyes nëse mundej të më tregonte se si ishin punët dhe më thotë se nga ana shkencore nuk janë kurrkund. Kjo ndodhte në vitet '80. E pyes përse dhe më përgjigjet: sepse shkencën ata e planifikojnë njësoj si tullat, si makaronat. Kjo ishte një formë e tejkaluar. Kështu që me vjen keq, sepse ai, zotëri që ka folur në emër të Akademisë, ai ka folur në emër të vet. Akademia e ristrukturuar ndihet shumë më e konfortuar, por është ndonjë që i ka ngelur ora në kohën sovjetike.
Ju iu referuar përmbytjeve të vitit 2004. Personalisht nuk bëj pjesë tek ata gazetarë apo analistë që e kanë konsideruar këtë si një faj njerëzor, por, megjithatë, po i referohem qëndrimit tuaj në ato kohë, si kryetar i opozitës, kur e keni akuzuar mazhorancën se hapi digat dhe u përmbyt Shkodra.
Përse e kam bërë këtë... A mund t'i dërgosh këta gazetarë në Shkodër? Absolutisht, nuk kanë paralajmëruar qoftë edhe një njeri të vetëm. Kjo duhet të investigohet. Në 2004, i hapën digat në mesnatë, pa u thënë as edhe një fjalë të vetme. Unë vizitova zonën dhe me treguan se kishin rënë për të fjetur dhe u zgjuan liqen. A mund të investigoni nëse ju dhanë një kacidhe, qoftë edhe një qindarkë dëmshpërblim. Atëherë çfarë ishte ajo? Në qoftë se unë të hap digën në mesnatë, qoftë edhe i detyruar, nuk të njoftoj fare dhe nuk të dëmshpërblej, kur ka një ligj për dëmshpërblimin, ligji i digave, i cili detyron poseduesit e digës të dëmshpërblejë për çdo pasojë të sjellë nga digat. Është ligj botëror. Këta zotërinj, jo vetëm që i hapën portat, por nuk u dhanë asnjë qindarkë zhdëmtim. Kjo ishte përmbytje. Unë isha opozita. Në qoftë se ata nuk donin që opozita të mos i akuzonte, le t'i shpërblenin dëmet, por jo të bënim të paditurin. Hap portat dhe unë nuk kam punë me ty. Ky ka qenë dallimi dhe këtë e kanë shprehur mbarë qytetarët. Shumë prej tyre janë çuditur, kur shihnin një angazhim të plotë e total të strukturave, sepse nuk e kishin parë ndonjëherë.
Ju u shprehët se ligji i digave detyron dëmshpërblim. Sipas ligjit të digave, kush është poseduesi i digave në Shqipëri?
Korporata Energjetike Shqiptare.
Dhe KESH-i duhet të bëjë dëmshpërblimin?
Jo. Ligji thotë; në rast se poseduesi nuk disponon burimet për t'iu përgjigjur plotësisht dëmit, detyron shtetin. Ligji është shumë i ndershëm. Hidrocentralet janë ndërtuar dhe në tërësinë e tyre, ata kanë një rol të fuqishëm mbrojtës mbi Shkodrën. Po marrim datën 27 dhjetor, kur Fierza sillte 1300 apo 1400 metër kub në sekondë ujë, 1300 sillte Komani, një sasi të madhe sillte vau i Dejës, imagjinoni ndërkohë Drinin se si do të tërbohej, po të zbriste me vrullin dhe energjinë që merrte nga malet e Pejës dhe Liqeni i Pogradecit dhe të vërvitej mbi Shkodër. Pra, digat bëjnë thyerjen, bllokimin e këtij vrulli. Janë mbrojtëse. Që të gjitha digat ndërtohen me parimin e sigurisë, që ato të mos i marrë përpara ngarkesa ujore dhe kanë tunelet e shkarkimit, në të cilat bëhet një shkarkim i disiplinuar. Kësaj radhe, ju i keni dëgjuar tek komentojnë se përse u rrit Fierza. Ajo u rrit, sepse nuk donim të vërshonin drejt tyre, orët e para, dy ditët e para, me mijëra e mijëra metër kub në sekondë ujë. U ndoq gradualiteti. Shpëtuam me këtë qëndrim çdo jetë njerëzore, sepse në mijëra e mijëra hektarë tokë sipërfaqe, niveli i ujërave ishte 2 deri në 4 metra dhe asnjë njeri nuk humbi jetën.
Ditën e dytë të fillimit të hapjes së digave, pashë në Shkodër policë, të cilët kishin javë pa gjumë dhe merreshin me transportin e njerëzve, pashë edhe 15 policë bashkiakë, të bashkisë Kamëz që kishin shkuar vullnetarisht për të ndihmuar dhe atje takoj një deputet të PS-së, një mik timin. I them se është e turpshme që mbi 300 policë të bashkisë së Tiranës ruajnë një pallat në qendër të Tiranës. Argumenti i tyre është se në vitin 2004 ishin mbi 22 mijë hektarë tokë të përmbytur dhe nuk flitej për katastrofë dhe nuk mund të flitet me 10 ha tokë të përmbytur për katastrofë. Sipas tyre, zoti Berisha po e zmadhon apo po e politizon, për ta detyruar opozitën të kthehet në parlament. Nëse u referohemi shifrave në hektar të përmbytjeve, realisht nuk mund të flitej për një prag katastrofe. A e keni pasur si qëllim zmadhimin e kësaj situate për të kthyer opozitën në parlament?
Absolutisht, gjëja e fundit që mund të më shkonte ndërmend është që unë të spekuloja me këtë deklaratë. Qëllimi dhe preokupimi im absolut ka qenë jeta e njerëzve, sepse moti ishte mot i madh. Më vonë observatorët botërorë e vlerësuan si një mot që përsëritet një herë në shekull. Por vazhdimi i përditshëm i shiut i bënte prurjet të paparashikueshme. Në vitin ‘78-‘79, liqeni ka qenë bosh, por janë regjistruar prurje deri në 5100 metër kub në sekondë ujë. Kështu që, në rast se shirat do të vazhdonin, ne do të detyroheshim të vazhdonin shkarkimet. Por mendoj se edhe me atë ujë që u grumbullua, sërish vlerësoja situatën. Nuk thashë kurrë katastrofë njerëzore, thashë gjithnjë jemi prag katastrofe dhe ajo është katastrofë ekologjike. Sepse aty është një zonë shumë e veçantë, një zonë me një diversitet të fuqishëm, me një pjellori shumë të madhe, me një larmi të bimësisë dhe specieve të jashtëzakonshme. Ato janë dëmtuar në një shkallë të konsiderueshme. Varet se sa e ndjen problemin ekologjik, por unë e ndjej atë dhe i kushtoj një rëndësi shumë të madhe çështjes së mjedisit. Edhe tani që flasim kemi mbi 4 mijë ha në ujë. E di që ajo që është fushë, pasi del nga uji nuk ka ndonjë problem madhor, por di se jo e tëra është fushë, janë kopshte e gjëra të tjera, të cilat janë dëmtuar.
Ligji i digave parashikon detyrimin e qeverisë për dëmshpërblimin e qytetarëve për të gjitha dëmet. A keni përcaktuar një shifër realisht dhe a e keni të mundur këtë kompensim? Keni premtuar dëmshpërblim qindarkë për qindarkë.
Absolutisht do të jetë qindarkë për qindarkë. Së pari, disponojmë çdo mundësi financiare për t'iu përgjigjur një më një dëmit dhe është në moralin dhe detyrimin tonë që ne ta bëjmë këtë. Ne e kemi faktuar këtë. Unë edhe në mbledhjen e fundit të qeverisë e deklarova dhe duhet ta theksoj edhe këtu, se nuk mund të mbetet asnjë qytetar që ta pësojë nga fatkeqësitë natyrore apo nga fatkeqësitë e tjera dhe qeveria të mos jetë një me të. Ndodhi tërmeti në Kavajë dhe atje po ndërtohet një fshat i ri, ndodhi tërmeti në Dibër, dje qeveria miratoi përllogaritjet e fundit për zonën e tërmetit. Unë merrja mesazhe vazhdimisht nga banorët se nuk janë dëmshpërblyer dhe i kam ndjekur edhe nëpër kronika mediatike. Sigurisht që ata do të dëmshpërbleheshin, por ishin probleme në përllogaritje e sipër. Ka një qëndrim të prerë të kësaj qeverie që në fatkeqësi natyrore dhe fatkeqësi të tjera, të qëndrojë së bashku me ta.
A ka një faturë financiare?
Fatura po përllogaritet. Situata ishte nën ujë dhe nën ujë nuk llogarit dot, nën ujë t'i do bësh çdo gjë që do të shpëtosh. Me largimin e ujit, duken dëmet dhe ke mundësi të llogarisësh. Dje u miratua vendimi, në bazë të të cilit do të krijohen grupet e vlerësimit, grupet e vlerësimit nisin punën që nesër dhe do të bëhet vlerësimi.
Sa garanci ka që fatura që qeveria shqiptare do të përllogarisë për këtë dëm, s'do të jetë më vogël realisht, sesa mund të jetë në të vërtetë? Qeveria shqiptare në mënyrë absolute nuk ka asnjë interes tjetër veçse zhdëmtimin e plotë e të ndershëm të dëmit. Interesi i saj është që të mos ketë abuzime dhe spekulime, sepse ky është interesi i qytetarëve. Qeveria paratë i ka të buxhetit. Doli dikush dhe tha se janë mbytur 30 kuaj, po pastaj. Fatmirësisht, aty e gjithë gjëja e gjallë është e matrikulluar, e regjistruar dhe regjistri i gjësë së gjallë aty është më i sakti, regjistri i bazës ushqimore të tyre, i orendive, i gjërave, s'është i vështirë . Së dyti, janë fotot satelitore, të cilat me precizion centimetrik faktojnë cilat shtëpi ishin të përmbytura dhe cilat jo. Tek përmbytjet ka edhe shumë zona informale, ndërtime që teknikisht nuk mund të ndërtohen. Jemi në proces legalizimi. Teknikisht ka shumë objekte apo banesa, të cilat teknikisht janë pamundura që të qëndrojnë aty. Do t'i legalizoni këto ndërtesa, të cilat mund të përmbyten sa herë të ketë shira apo jo? Ky problem do të shqyrtohet. Së pari, askush nuk përjashtohet nga dëmshpërblimi. Së dyti, do fillojë menjëherë një rishqyrtim tërësor i situatës për të parandaluar në maksimumin e mundshëm, nuk them se mund të parandalohet 100 për qind, se Gjermania bëri investimin më të madh në disiplinimin e Elbës dhe Rinit lumenjve dhe në mos gaboj, në vitin 2003-2004, të dy ato lumenj dolën dhe bënë vërshime të jashtëzakonshme dhe krijuan një situatë shumë të rëndë, parashikimi nuk mund të jetë kurrë absolut, por e rëndësishme është që ne të ndërmarrim një plan të ri të fuqishëm investimi të gjithanshëm, shumë i kushtueshëm, në mënyrë që të përjashtojmë maksimalisht mundësitë e përmbytjeve. Investim shumë i kushtueshëm. Me çfarë parash do bëhet ky investim? Shqipëria nuk është një vend i pasur, por Shqipëria nuk është një vend i varfër, siç ka mbetur në mendjen e shqiptarëve. Jo, absolutisht, është një vend me potenciale reale, një vend që ka ndërtuar vepra të përmasave botërore, siç është rruga Durrës-Kukës. Shqipëria nuk është ajo që ka qenë, por është një Shqipëri krejt tjetër, me potenciale shumë më të mëdha. Këto fonde mund të përdoreshin, kjo është e vërtetë, por ama emergjenca është emergjencë dhe ne duhet t'u dalim zot. Do të thellojmë Bunën dhe ky lumë do të bëhet i lundrueshëm. Unë nuk shoh ndonjë interes madhor se do të krijohet një port, apo një doganë, siç ka qenë dikur, sepse sot jemi në kohën e shpejtësive të tjera, por do të ketë edhe një funksion turistik shumë të mirë dhe për këtë jam i sigurt, sepse do të krijojmë një mundësi tjetër që nga Ulqini, nga Budva, nga Tivari, turistët të vijnë në Shkodër. Para ca ditësh është shpallur fituese për të ndërtuar autostradën Prishtinë-Morinë firma Bechtel&Enka. A ka ndikuar qeveria shqiptare për këtë firmë? A jeni i kënaqur me cilësinë e punimeve të kësaj firme? Unë personalisht nuk kam lobuar, por fitimi i tenderit nga kjo kompani është një garanci që ajo rrugë të ndërtohet me shpejtësi. Kaq mund të them. Unë jam shumë i kënaqur me kohën, me cilësinë. Të mos harrojmë një gjë, kjo kompani ka realizuar në 2 vjet vëllime punimesh sa pothuaj dy herë kaskada e Drinit, digat, të gjitha së marra së bashku, ose ka realizuar ura, të cilat, po t'i përllogarisësh, rrezik më shumë se të gjitha urat ekzistuese në Shqipëri. Pra, vëllim i jashtëzakonshëm. Jam shumë i kënaqur me cilësinë, jam shumë i kënaqur me kohën dhe në tërësi me të gjithë problematikën. Ka një shembje në tunel, por janë jo një, por me dhjetëra tunelet që krijojnë probleme shembjesh. Edhe tani së fundi, nga tuneli më i gjatë në Europë doli një masë e madhe dheu dhe çka bllokoi faktikisht për mbi 6 muaj punimet, ose vendit fqinj Greqisë i janë dashur shumë vite për të stabilizuar një tunel 2 km, por kjo nuk do të thotë se hiqet dorë nga tuneli. Ka një problem, ku pati shembje në tunelin e pahapur dhe po punojnë për zgjidhjen e problemit ekspertët më të mirë të Europës, një grup austriako-gjerman.
Këta ekspertë po i merr qeveria shqiptare apo firma ndërtuese? Qeveria shqiptare.
Kjo do të thotë se nuk keni besim tek firma ndërtuese? Firma ndërtuese është ndërtuese, nuk është projektuese. Midis projektuesve të mëparshëm dhe këtyre u përzgjodhën këta, sepse këta kanë një emër më të madh ndoshta në Europë përsa i përket çështjes së tuneleve.
A ka një afat kohor kur ai do të jetë i përfunduar?
Sipas projektuesve dhe firmës, në pranverën që vjen tuneli do të jetë i gatshëm.
Problem financimi nuk ka?
Absolutisht jo.
Raporti i KE-së bën thirrje të herëpashershme për dialog politik, pika e parë kthimi i opozitës në parlament, por dialog politik dhe hetim të zgjedhjeve. Kryetari i opozitës ka deklaruar pas këtij raporti, dialog politik menjëherë, por hapni kutitë....
Komenti im është ky. Kemi të bëjmë me një draft, por e marrim kështu siç është dhe themi se kjo është një rezolutë. E theksova këtë, sepse ky është një draft që nuk është dhënë për diskutim këtu, megjithatë nuk ka asnjë të keqe pse diskutohet. Dialog çdo ditë dhe çdo orë, ku të dojë dhe kur të dojë z. Rama, në kuadër institucional. Unë nuk përjashtoj as komunikimin qoftë zyrtar, qoftë jo zyrtar, nuk mund të jetë në mënyrë absolute pengesë as gjykimi im apo vlerësimi im për të, as .... im ndaj tij në zhvillimin e dialogut. Unë e kam faktuar. Së dyti, mendoj se kërkesa për komision hetimor parlamentar është një kërkesë e shprehur në mënyrën më të përsëritur nga unë personalisht. Së treti, kërkesa që opozita të jetë në parlament është thënë me qindra, në mos me mijëra herë, gjatë këtyre muajve. Këto janë kërkesa shumë legjitime. Problemi është se në qoftë se ky është testi, në qoftë se zoti Rama është dakord me rezolutën, projektrezolutën çështja është e zgjidhur menjëherë. Që nesër ne krijojmë komisionin parlamentar, që nesër ne i japim shumicën zotit Rama, siç e kërkon, gjë që e kam shprehur, që nesër ne përcaktojmë objektin e hetimit, pa kufizuar asgjë tjetër, përveç asaj që nuk mundet kush kurrë ta kërkojë ose ta mbështesë, rinumërimin e votave. Sipas opozitës, ose sipas një pjese të mirë të mediave pranë z. Rama, ky draft apo projektrezolutë lë të kuptojë qartë se kutitë mund të hapen? Absolutisht jo, nuk ka njeri në botë që mund ta bëjë. Këshilli i Europës është bazuar mbi një nga parimet bazë të themelimit të tij në fund të viteve ‘40 , ka qenë zgjedhje të lira, këto janë zgjedhjet e lira... Këto nuk ka personalitet, përveç ndonjë marksist-leninisti ose ndonjë trockist që janë gjithnjë e më të skajuar, që mund të pranojnë që një vendim gjykate të mund të rivlerësohet. Këtë nuk ka institucion demokratik që mund ta imagjinojë që një vendim gjykate të rivlerësohet politikisht. Kjo është e pashpresë. Në qoftë se ka një gjë unike sot, në mbarë komunitetin ndërkombëtarë, në të majtë dhe të djathtë, është vetëm kjo. Të tjerat pastaj. Ky është testi për z. Rama. Nëse z. Rama kërkesën për rinumërim votash, e ka për të mos u futur në parlament dhe e di mirë që kjo nuk plotësohet. Por, meqenëse nuk do të futet në parlament, thotë që unë dua hapjen e kutive, sepse është njëlloj si të thuash dua rinumërimin e votave, është identike, njëlloj sikur thua unë nuk hyj në parlament. Kushtetuta ka pika në nenin e mbarimit të mandateve, a. kur nuk bën betimin. b. kur jep dorëheqjen. Të dyja njëlloj, por e para të jep mundësi që të mos shkruash dorëheqje, të lë mundësi që dakord të mos japësh dorëheqjen me shkrim për të bërë scoop mediatik, për të bërë lajm mediatik, nuk e bën betimin dhe ikën. Në këto jemi në rrethanë identike. Po the sot rinumërim votash, thua nuk hyj në parlament. Automatikisht për çdo njeri, përveçse ata, që i përmbahen doktrinës marksiste-leniniste apo trockizmit, për të cilët institucionet demokratike janë për t'u rrënuar, ndaj institucioneve demokratike ka një qëndrim armiqësor apriori për shkak të doktrinës, unë nuk mund të paragjykoj, pra, për të gjithë ata, të cilët...
Kush janë trockistët apo marksistët-leninistët?
Dihet se në doktrinën e revolucionit permanent është e njohur që t'u biem institucioneve të borgjezisë, vota nuk ka rëndësi, vullneti nuk ka rëndësi, rëndësi ka proletariati, pra, ajo është një skemë e tejkaluar tërësisht. Revolucionar permanent në Shqipëri ka qenë dhe është Spartak Ngjela. E keni pasur disa vite afër. Si ka mundësi që paskëshit pasur një trockist kaq afër?
Njeriu që ka marrë rolin e Dushanit, ta vazhdojë atë. Ti po më pyet për atë që ishte, tani është kthyer në Dushan Mugosha e Partisë Socialiste. Ajo parti ka nevojë për Dushan, ajo parti s'jeton dot pa të. Kaq mund të them për të.
Megjithatë ju u shprehët se jeni i gatshëm të takohemi me kryetarin e opozitës? Absolutisht i gatshëm.
Për të negociuar, apo për ta takuar?
Besoj për të pirë kafe nuk ka kuptim. Mua nuk më ndikon asnjë gjë në parimet që unë kam. Unë jam i hapur për dialog me cilindo. Natyrisht jo në rrugë. Me z. Rama kam bërë marrëveshje ndër më të mëdhatë të jetës sime, për Kushtetutën, sistemin zgjedhor dhe një seri marrëveshjes të tjera. Unë kundërshtarin as nuk e zgjedh, as nuk e paragjykoj. Në vetë natyrën time, as nuk merrem me përshkrimin e tij. Jo, ai është ai që është, detyra ime është të ruaj parimet.
Kryetari i partisë kundërshtare më shumë se njeri politik është mediatik, pra, apolitik, por kjo ndoshta ju jep luksin të jeni pothuajse i vetëm në pushtet, megjithatë keni 64 deputetë mandate të opozitës përballë, gati gjysmën. Në çfarë forme këto mandate do të hyjnë në parlamentin e Shqipërisë?
Unë dua t'i deklaroj të 64 deputetëve të PS-së dhe 4 milionë shqiptarëve se secili prej tyre është i lutur dhe shumë i mirëpritur të zërë vend në parlament. Ky është qëndrimi i Sali Berishës ndaj tyre. Më mënyrën më të prerë, është jashtë çdo lloj koncepti se të ikë ky dhe të vijë ai në Partinë Socialiste, apo në çdo parti tjetër politike, por edhe njëherë, në rast se kërkesa për rinumërim votash, vota të numëruara në mënyrën më transparente në historinë e planetit, - a e dini që kur bashkëbiseduesve të mi të të gjitha niveleve unë u shpjegoj se çdo votë u filmua, u shfaq në ekran, u transmetua në kohë reale në KQZ, absolutisht del jashtë çdo lloj imagjinate, më thonë e mahnitshme, s'është bërë kurrë kjo. Kjo bëri që votat jo vetëm janë numëruar, por janë certifikuar nga 22 mijë anëtarë dhe përfaqësues të PS-së, janë vlerësuar në KQZ, janë vlerësuar ankesat në gjykatë, janë vlerësuar të gjitha pretendimet nga ODIHR-i dhe OSBE-ja. Merr raportin e 2001-it dhe ODIHR/OSBE thotë se opozita solli fakte të atilla, të cilat na detyruan ne të ndryshojmë qëndrimin tonë në raport dhe kjo është shkruar e zezë mbi të bardhë. Pra, kur të gjitha këto instanca certifikojnë zgjedhjet, kjo është arsyeja që ka bërë që deri më sot askush dhe asnjeri të mos mbështesë kërkesën e rinumërimit dhe të mos mund ta mbështesë, sepse ti i kërkon Sali Berishës, i kërkon komunitetit ndërkombëtar, Parlamentit Europian, Komisionit Evropian, OSBE-së, Këshillit të Evropës, atë që ata nuk mund ta japin kurrë . I kërkon vlerësimin e vendimit të gjykatave në rrugë politike, shkelmimin e Kushtetutës së vendit, të vendimeve të Gjykatës Kushtetuese, të ligjit të zgjedhjeve. Ka një debat se marrëveshjet politike janë të nevojshme?
Kur vendi ka një ngërç, sigurisht që marrëveshjet janë të rëndësishme, por jo jashtë çdo limiti, të ulemi dhe të përmbysim Kushtetutën, të përmbysim kushtetutshmërinë. Kjo s'është marrëveshje. Kjo është hata për demokracinë. A mund të lexoni të gjitha vlerësimet që ka bërë OSBE/ODIHR për vendimet e gjykatës Kushtetuese në vitin 2001? Janë bërë të gjitha të tjerat, por s'është bërë kurrë vlerësimi i këtij vendimi, sepse nuk mund të shkojë ndërmend, ka shkuar ndër mend çdo lloj varianti, por ky variant nuk shkon ndër mend, sepse kjo është t'i bësh gjëmën sistemit tënd demokratik. Z. Rama, kundërshtari juaj, ka thënë probleme që janë të lexueshme, e para delegjitimiteti i këtyre zgjedhjeve për të justifikuar rizgjedhjen në krye të partisë, e dyta, gjetja e argumenteve për t'u rikthyer në parlament. Duke qenë se tashti nuk është më sekret fakti se aksioni kryesor politik i kundërshtarit tuaj politik, z. Rama, lindin apo prodhohen në lokalet kryesore të Tiranës, nëse PS-së i jepet Presidenti për të bërë analogjinë me zgjedhjet e vitit 2002, kur parlamenti nuk kishte legjitimitetin e plotë, a do të ishin i gatshëm që z. Rama edhe të zgjidhte problemet e veta, por të propozonte për President z. Nano? Pra, rikthehet në parlament me një argument, por edhe heq qafe një problem politik brenda PS-së?
Jashtë çdo lloj konteksti që Sali Berisha do të pranojë penalizimin e zgjedhjeve më të mira në historinë e vendit, zgjedhjeve, të cilat përmbushën standardet kryesore të OSBE/ODIHR-it , zgjedhje, për të cilat nuk pati asnjë provë të vetme për manipulim rezultati apo numërimi. Kjo nuk mund të shpërblehet, sepse në qoftë se shpërblehet bojkoti, bojkoti do të bëhet mekanizëm permanent destabilizimi i këtij vendi. Unë nuk kam ndër mend të lë një trashëgimi të tillë dhe unë kam një parim politik, po e them sot publikisht. Në vitin 1997, kur njerëzve u kishte humbur shpirti në skemat piramidale të financave, në momente dhimbje shumë të madhe, unë, Sali Berisha, mund të bëja atë që bëri rivali im dhe të thosha se unë do paguaj paratë e humbura. Qëndrimi im ka qenë ky: një borxh që unë nuk e kam marrë, nuk mund ta njoh kurrë. U them unë qytetarëve, unë ndjej dhimbjen tuaj, e përjetoj atë, por nuk jam unë që ju kam kërkuar të vendosni paratë në skemat piramidale. Unë nuk ju ruajta dot prej tyre dhe kjo është përgjegjësia ime, por ju paratë i keni vendosur vetë, nuk ju ka borxh qeveria , nuk i ka prekur asnjë qindarkë të atyre parave. Edhe sot e them se është jashtë çdo lloj logjike që unë të pranoj të jem borxhli, për atë që nuk jam. Njeriu dhe detyrimi, njeriu dhe borxhi janë të lashta sa vetë lashtësia. Njeriu i qytetëruar nuk mund ta pranojë kurrë. Duke theksuar këtë, a jam i gatshëm unë për koncesione ndaj opozitës? Brenda limiteve pa asnjë diskutim dhe jo një, por të shumta. Do komisionin - urdhëro zotëri. Je në opozitë dhe cili është interesi më madhor i opozitës? Zgjedhjet. Pra, të hartojë, të bëjë projekt për të gjitha amendamentet për rekomandimet e OSBE/ODIHR-it dhe unë i votoj pa asnjë modifikim, brenda standardeve ndërkombëtare, siç të votova Kodin, siç më imponove me Kodin Zgjedhor të gjitha ato që deshe, por, kur unë u them kolegëve të mi se opozita përcaktoi sistemin, absolutisht më shohin me habi dhe kjo, sepse doja me çdo kusht t'i jepja sigurinë maksimale. Pra, për ta mbyllur, opozita nëse është e interesuar për karrige që nuk i takon, zgjedh rrugën më të gabuar, është e interesuar për proces zgjedhor normal, është e mirëpritur për çdo lloj kontributi që mund të japë, është e interesuar për probleme të tjera që nuk ka vendosur gjykata, që nesër. Nuk mund t'i jepni opozitës komisione që kanë të bëjnë me cenimin e rezultateve, pasi ajo është një borxh që nuk e keni prekur. Keni fituar zgjedhjet, nuk keni pse të bëni lëshime në raport me rezultatin e zgjedhjeve. Megjithatë ka një rezultat të ngushtë. Shqipëria është vend pluralist, ç'i kushton kësaj mazhorance t'ia lërë zgjedhjen e presidentit opozitës? Absolutisht, sepse është minorancë. Absolutisht, sepse kjo do të thotë të shndërrosh mazhorancën në minorancë dhe në momentin që ndodh kjo dhe flasim për institucionin kryesor të shtetit, do të thotë të përmbysësh parimin themelor ku mazhoranca qeveris, pakica bën opozitën. Këtu shkel parimin më elementar të demokracisë.
Në vitin 2012, Presidenti do të jetë sërish i maxhorancës? Pa diskutim, jashtë çdo lloj diskutimi. Ka një Kushtetutë dhe z. Rama votoi për këtë Kushtetutë. Unë isha për president të zgjedhur nga populli, ndërsa z. Rama ma imponoi në mënyrë ultimative që jo. Absolutisht, i kam thënë në mënyrën më të përsëritur që unë jam që presidenti të zgjidhet nga populli dhe unë nuk isha i gabuar në këtë pikëpamje. Një praktikë kjo që ekziston më rajon. Në republikën parlamentare perëndimore ç'është e vërteta nuk është. Z. Rama ishte kundërshtar kategorik i saj. Presidenti aktual është president i maxhorancës?
Besoj se po flas për z. Rama. Presidenti aktual është kryetari i shtetit.
Z. Rama po akuzon në mënyrë të përsëritur treshen Berisha-Meta-Nano? Ka parë të keqe të madhe nga ne se është aty ku është. Z. Rama nga kjo treshe ka të gjithë karrierën e tij politike, por, megjithatë, është normale të akuzosh.
Nga kush ka karrierë politike? Nga z. Nano dhe z. Meta mund të ketë, por nga ju, z. Rama nuk mund të ketë përfituar në karrierën politike. ju e keni ndihmuar z. Rama në karrierën politike?
Tani e vërteta është se nëse z. Rama është ai që është, është nga kjo treshe, jo nga ndonjë treshe tjetër. Unë nuk kërkoj asgjë. Unë atij nuk i kërkoj asgjë
Ju po lini të kuptohet se e keni ndihmuar z. Rama?
Unë po lë të kuptoj se në pretendimet e tij për këtë treshe ka një moment të thellë mosmirënjohje, por për të cilën unë nuk kam keqardhje. Dakord, ai ka mosmirënjohje, por ekziston kjo treshe, ky bashkëpunim Berisha-Nano-Meta? Sot, unë me z. Meta jam në koalicion. Siç e shihni, koalicioni funksionon shumë mirë. Ai kaloi një provë ndër më të mëdhatë. Operacioni në Shkodër ishte prova më e fuqishme e një qeverie dhe unë mund të them se e kam ndjekur në çdo minutë, në çdo orë, me preokupimin më të madh, por, natyrisht, e kam ndjekur funksionimin e makinerisë, sepse vende të tjera, me një makineri më të fuqishme se e jona, patën humbje me të njëjtën shkallë të përmbytjes, si e jona, në shkallë të dytë, humbën rreth 30-40 njerëz, ne nuk humbëm asnjë jetë. Kjo qeveri funksionon. Megjithatë Ministria e Ekonomisë dhe Energjetikës i përket LSI-së. Pas përmbytjes në Shkodër, a ka pasur dyshime për bashkëqeverisjen tuaj me LSI-në? Në mënyrë kategorike, raportet kanë qenë shumë normale. Nuk është ministri ai që menaxhon digën. Ne edhe themi të krijojmë sipërmarrjen publike me autonominë e tyre, edhe themi sipërmarrje qeveritare. KESH-i është një sipërmarrje publike, e cila ka funksionuar dhe funksionon në aspektin e menaxhimit të prurjeve dhe shkarkimeve mbi bazën e një rregulloreje, që harmonizon prodhimin e energjisë, mbrojtjen e digës, shkarkimin. Kjo rregullore, cilido që e sheh, është zbatuar pikë për pikë. Ka një të vërtetë që Fierza, e cila ishte në datën 27 kishte një prurje me 1170 metër kub në sekondë, kalonte automatikisht në nivel të pranueshëm 296 metra, nuk arriti kurrë atë nivel. Ka një të vërtetë tjetër, që shkarkimet nga Fierza, në kohën e prurjeve maksimale në Koman, nuk u lejuan. Kjo krijoi mundësi.
Pra jeni i kënaqur me ministrat e LSI-së? Jam plotësisht i kënaqur dhe unë shoh një përgjegjësi dhe kompetencë të plotë nga ana e këtyre ministrave në detyrën që i janë ngarkuar. Në vitin 2002, pas kontestimit të zgjedhjeve, në një intervistë i jeni referuar z. Meta duke e krahasuar me Mehmet Shehun, madje sipas jush, z. meta mburrej me këtë? Tani viti 2001 është shumë vite larg 2010-ës, po të marrim parasysh shpejtësinë e këtyre viteve, i bie të jetë 28 vite larg. Jeni shprehur se në 5 mars opozita, në rast se nuk është në parlament, ka zëvendësim të mandateve, por me ligj zëvendësimi i mandateve bëhet nga KQZ-ja, me shumicë të theksuar votash ? Absolutisht jo. Ky zëvendësim mandatesh nuk përcaktohet në mënyrë absolute nga shumica, s'ka lidhje me shumicën. Nuk përcaktohet kategorikisht nga KQZ-ja. Në këtë vend dhe në çdo vend të lirë nuk ka gjë më të mbrojtur se mandati. A e dini që mandati është më i mbrojtur se Presidenti i Republikës, ka një mbrojtje të jashtëzakonshme si kusht për demokracinë dhe askurrkush nuk mund të cenojë mandatin. Në rastin konkret, kemi të bëjmë me një vendim të deputetëve socialistë për të mos ushtruar, sipas përcaktimeve kushtetuese të vendit, detyrën e tyre. Të dy klauzolat e Kushtetutës që imponohen në datën 4 mars, janë që të dyja vullnet vetëm i deputetit dhe askujt tjetër, as i shumicës, as i gjykatës, as i KQZ-së, as i parlamentit.
Por zëvendësimi certifikohet nga KQZ-ja?
Sepse ka një listë në KQZ. Ajo është një gjë shumë normale. Deri para këtij sistemi, në rast se ju kujtohet kur iku Ismail Lleshi, ndonëse atëherë ndryshoi sistemi, por para këtij sistemi, po të ikte një deputet bëhej zgjedhje. Në këtë sistem, u detyruan që të paraqiten 140 kandidatë dhe çdo parti të paraqesë numrin e deputetëve që mund të prodhojë qarku, zona elektorale, rajoni dhe të gjithë ata, të cilët janë në listë janë deputetë potencialë. Në rast se nuk ushtrojnë detyrën 1,2,30, 50 prej deputetë, ata janë kandidatë potencialë. Nuk është se po i merr nga rruga ata. Ata i kanë prurë partitë, janë një përzgjedhje. Ju them se këta që janë futur në parlament nga partia ime janë të shkëlqyer, por, absolutisht, mendoj se nuk janë futur në parlament të tjerë të shkëlqyer dhe shumë të mirë. Kjo është çështje e sistemi. Por duhet një vendim i KQZ-së dhe ky kërkon votim?
Absolutisht kërkon votim të thjeshtë fare, se ata janë të certifikuar. Këta zotërinj nuk pranojnë të bëjnë betimin. Nëse ata vendosin të vijnë në datën 4 me bë betimin dhe po marr si variant se nuk rrinë në sallë, i përjashton dot pa kaluar 6 muaj? Absolutisht jo.
...Më duket se do ta bëjnë...
Nuk e di, po e marr si shembull. Pra, ne nuk kemi asnjë tendencë, ata përjashtojnë veten. Nëse përjashtojnë veten, nuk ke ç'ti bësh. Kushtetua çfarë thotë: a. deputeti humbet mandatin kur nuk bënë betimin b. kur jep dorëheqjen. Cila është e ardhmja e parlamentit, nëse ata vijnë bëjnë betimin dhe nuk vijnë më? Këtu nuk është mazhoranca që mund të vendosë. Vendimet i merr në sovranitet të plotë PS-ja, udhëheqja e saj, deputetët e saj. Çfarë qëndrimi do mbajnë ata unë nuk e di. Di një gjë dhe për këtë jam shumë i vendosur. Në mënyrë absolute, në një vend anëtar të NATO-s, në një vend që po punon intensivisht për anëtar të BE-së, nuk do të mundet kush të viktimizojë Kushtetutën, se pastaj kthehemi në një kohë nga e cila jemi fatlum se u larguam. A mundem unë të viktimizoj Kushtetutën pse ky apo ai deputet nuk pranon të bëjë betimin? Jo, zotëri. Kjo është zgjidhje e tij. Është një gjë që unë se bëj kurrë ta imponoj, po të jetë në partinë time u them të përjashtoj dhe kaq, por tek një parti tjetër s'u them dot asgjë. Ka këtu ka një gjë, ndonëse mendimi i ekspertëve është unanim. Zëra, të cilët kanë, absolutisht, interesa strikt jo të ndershme mbajnë teorinë e revolucionit permanent. Çfarë do të thotë t'i deklarosh tjetrit se unë rezultatin e njoh, por në parlament nuk hyj.
Kush e ka deklaruar? Z. Rama ka deklaruar vetë, sipas z. Lelouche. Këtu kemi të bëjmë me një doktrinë krejt tjetër dhe ata që e mbështesin ata në mënyrë të qëllimshme apo të paqëllimshme mbështesin doktrinën marksiste-leniniste, të cilët u faktuan që qenë një falimentim i plotë. I keni premtuar shqiptarëve lëvizjen e lirë në 2010. A do ta mbani këtë premtim apo jo?
Plotësisht.
Në korrik do të lëvizin shqiptarët pa viza?
Unë kam premtuar vendimin, a do merret në mars, a do merret në korrik, a do merret në qershor, unë kam premtuar se brenda vitit të parë të mandatit tim do të merret vendimi që shqiptarët të lëvizin pa viza. Për këtë unë jam shumë i sigurt, këtu unë qëndroj. Vendimi do të merret deri në korrik? Jam i sigurt që vendimi do të merret se ne po punojmë në mënyrën më serioze, më të vendosur, po plotësojmë çdo kusht dhe kërkesë, që shqiptarët të lëvizin të lirë dhe unë kam besim të madh në vlerësimin objektiv të KE-së, Parlamentit Europian, të ministrave të brendshëm të vendeve anëtare të BE-së dhe kjo do ndodhë.
FUND
