Tiranë, 8 shkurt, NOA - Dita e sotme përkon me atë të nisjes së mundshme të negociatave të paralajmëruara nga presidenti i Republikës, Bamir Topi, mbi zgjidhjen e krizës aktuale politike në vend.
Bëhet fjalë për takimet që ai parashikohet të zhvillojë me krerët e dy kampeve të politikës, Rama dhe Berisha me qëllimin e zgjidhjes së ngërçit që ka bllokuar prej muajsh legjislativin për shkak të mungesës brenda tij të grupit të deputetëve socialistë.
Nga ana e tyre, këta të fundit duket se nuk kanë hequr ende dorë nga pretendimet lidhur me kutitë e votimit të 28 qershorit për hapjen apo moshapjen e tyre.
E në këtë situatë, duket se ka ndërhyrë edhe faktori ndërkombëtar, i cili përmes takimeve të kryera me përfaqësuesit politikë në vend, ka kërkuar që presidenti të ndërhyjë sa më parë për të zhbllokuar situatën politike, që sipas tyre paraqitet mjaft e rënduar.
Konkretisht, pas dy takimesh të zhvilluara me ambasadorin e KE, Lohan dhe atë të Spanjës, Montobio, bëhet me dijeni se do të ketë sërish një takim të tyre sot me kreun e shtetit, Bamir Topi.
Takim ky i cili do të pasohet edhe me atë që presidentin Topi do të zhvillojë një orë më pas me ambasadorin amerikan, Uithers.
n.e/NOA
