Më shumë foto, te Galeria
"Partia e opozitës shqiptare të kthehet në Parlament dhe të bashkëpunojë me qeverinë e zgjedhur në mënyrë demokratike nga qytetarët shqiptarë, në mënyrë që të mund të garantohen reformat e nevojshme për Shqipërinë që ajo të marrë statusin e vendit kandidat për anëtarësim në Bashkimin Evropian"
Bruksel, 13 Shkurt NOA - Një tjetër apel i fortë ndërkombëtar ndaj opozitës që të futet në Kuvend, erdhi sot vetëm pak orë pas përfundimit të raundit të parë të bisedimeve Rama-Berisha në selinë e Presidentit.
"Opozita të kthehet në Parlament dhe ajo të bashkëpunojë me Qeverinë", është thirrja e fortë që u lëshua para disa minutash nga Roberta Angelilli, zëvendëspresidente e Parlamentit Evropian."Parlamenti Evropian, në rezolutën e miratuar ka njohur progresin e bërë nga Shqipëria dhe përmirësimin e kuadrit ligjor dhe administrativ të procesit elektoral që u reflektua dhe në zgjedhjet e fundit parlamentare", thekson Angelilli.
"Në të njëjtën kohë, selia e Straburgut ka kërkuar që opozita të mbyllë bojkotin e Parlamentit duke e ftuar të kryejë obligimin e përfaqësimit të zgjedhësve të saj në Parlament", ka theksuar më tej, Roberta Angelilli, duke folur sot mbi krizën politike në Shqipëri.
"Bashkohem me deklaratat e formuluara nga z. Joseph Daul, President i Grupit të Partive Popullore Europiane që ka kujtuar faktin se është shumë e rëndësishme të kihet parasysh që vëzhguesit ndërkombëtarë që morën pjesë në monitorimin e zgjedhjeve të qershorit 2009, nuk evidentuan asnjë parregullsi në procesin zgjedhor", - ka vijuar më tej, Roberta Angelilli.
"Ajo që dua të them", - vijon Angelilli duke përmbyllur deklaratën e saj, është që partia e opozitës shqiptare të kthehet në Parlament dhe të bashkëpunojë me qeverinë e zgjedhur në mënyrë demokratike nga qytetarët shqiptarë, në mënyrë që të mund të garantohen reformat e nevojshme për Shqipërinë që ajo të marrë statusin e vendit kandidat për anëtarësim në Bashkimin Evropian".
e.r/NOA
Më shumë mbi argumentin e ditës:
Berisha: Me Ramën nuk zgjidhim çështje që kanë të bëjnë me gjykatat
Rama: Hapja e kutive është vullnet politik, nuk tërhiqemi
Negociatat, Berisha-Rama, tre orë bisedime nuk ndryshojnë qëndrimet
Topi: Nuk do ketë zgjidhje ekstremisht pozitive për njërën palë
