Tiranë, 14 shkurt, NOA, Update- Opozita do të organizojë një protestë të madhe popullore, nëse tryeza e thirrur nga Presidenti, Bamir Topi nuk do të jap rezultat.
Lëvizja e radhës e opozitës është konfirmuar nga aleati i PS-së, Spartak Ngjela, sot në një prononcim për mediat pas takimit me kryetarin e PS-së, Rama dhe aleatët e tjerë.
Ngjela tha se e drejta kushtetuese e opozitës nuk mund të mos merret parasysh.
"E vetmja çështje me të cilën u ndava nga tryeza është fakti i caktimit të një datë për protestën e madhe. Por për faktin që mund të shkaktojë shqetësim për tryezën në ditët e ardhshme, do të mblidhemi dhe të caktojmë një ditë kur të shohim që kjo tryezë nuk vlen", u shpreh Ngjela.
Ai ka hedhur poshtë mundësinë e diskutimi në nivel ekspertësh duke thënë se, "ekspertët fillojnë në momentet kur bëhen modalitetet e hapjes së kutive".
Ngjela ka shtuar se tryeza është mes dy kryetarëve dhe ata duhet të gjejnë zgjidhje.
"Tryeza është midis dy kryetarëve. Janë kryeministri aktual me kryeministrin në hije, të dy do të diskutojnë për çështjen e krizës, ose zgjidhet në tryezë ose zgjidhjet në mënyra të tjera", u shpreh ai, ndërsa ka shtuar se Komisioni Hetimor ka të drejtë të bëjë transparencën e plotë.
xh/NOA
