Policia shqiptare dhe ajo greke kryejnë operacionin "Rrjeta e gjelbër"
Kakavijë, 14 Shkurt NOA - Policia shqiptare dhe ajo greke përmes një operacioni të përbashkët të koduar me emrin "Rrjeta e gjelbër", ka kryer bllokimin dhe shoqërimin e rreth 90 shtetasve shqiptarë të cilët synonin Greqinë duke hyrë ilegalisht në vendin fqinjë.
Në këtë aksion u gjet dhe një vajzë e cila sipas hetimit po dërgohej në Greqi për t'u përdorur si prostitutë e gjithashtu janë ndaluar edhe dy të dyshuar si trafikantë klandestinësh.
Operacioni
Burime zyrtare nga policia e Gjirokastrës, thanë se aksioni i 48 orëve të fundit, erdhi në vijim të operacioneve me afat të shkurtër kohor që Policia Kufitare e Drejtorisë Rajonale për Kufirin dhe Migracionin Gjirokastër ka zhvilluar në bashkëpunim me Policinë Greke.
Plani i operacionit të koduar "Rrjeta e Gjelbër", ishte "për parandalimin e kalimit të paligjshëm të kufirit si dhe për goditjen e të gjitha rasteve të trafiqeve që mund të zhvillohen nëpërmjet kufirit të gjelbër me shtetin grek.
Fillimisht është zhvilluar një takim midis Drejtorit të Drejtorisë Rajonale të Kufirit dhe Migracionit Gjirokastër dhe Drejtorit të Policisë Kufitare të Janinës si dhe midis Shefave të Stacioneve Kufitare të të dy palëve ku është bërë edhe ndarja e zonave të patrullimit sipas piramidave, me qëllim mbulimin e të gjithë territorit jeshil me forca të policisë të të dy palëve.
Në përfundim të Operacionit u arritën këto rezultate:
Nga ana e shërbimeve të Policisë Kufitare të Drejtorisë Rajonale për Kufirin dhe Migracionin Gjirokastër gjatë dy ditëve të operacionit janë bllokuar dhe kthyer mbrapsht 58 shtetas të cilët tentonin të kalonin kufirin në mënyrë të paligjshme.
Po kështu është bllokuar edhe një femer qe dyshohet se është viktimë e trafikut, ku për këtë rast po punojnë strukturat e specializuara të Drejtorisë së Policisë së Qarkut Gjirokastër për zbardhjen e plotë.
Nga ana e Policisë Greke gjatë dy ditëve të operacionit janë bllokuar dhe kthyer mbrapsht 30 shtetas të cilët kishin për qëllim kalimin e kufirit në mënyrë të paligjshme për në shtetin grek.
Po nga këto shërbime janë kapur dhe arrestuar dy shtetas për veprën penale "Dhënie ndihmë për kalim të paligjshëm të kufirit".
Policia tha se operacione të tilla me afat të shkurtër kohor do të zhvillohen edhe në ditët e ardhshme.
v.d/e.r/NOA
