Tiranë, 18 shkurt, NOA - Në mjediset e dikasterit të Jashtëm, sot janë zhvilluar konsultime diplomatike mes delegacioneve të ministrisë sonë të Jashtme dhe asaj të Hungarisë. Lajmi konfirmohet nga burimet zyrtare të MPJ-së, sipas të cilave delegacionet respektive u kryesuan nga zv/ministrja e Jashtme Edit Harxhi dhe sekretari i Shtetit të MPJ të Hungarisë, Jena¶ Faller. Të dy palët vlerësuan nivelin shumë të mirë të marrëdhënieve dypalëshe dhe ranë dakort për thellimin dhe zgjerimin e bashkëpunimit dypalësh në fusha me interes të ndërsjelltë.
Zv/ministrja Harxhi theksoi se dy sfidat imediate të Shqipërisë në kuadër të integrimit evropian, janë liberalizimi i vizave dhe marrja e statusit kandidat.
Në këtë kuadër, ajo e informoi homologun e saj hungarez mbi plotësimin e të gjitha detyrimeve të udhërrëfyesit për vizat si dhe për ecurinë e procesit të përgjigjeve të pyetësorit të Komisionit Evropian.
Më tej, Harxhi u përqendrua në marrëdhëniet dypalëshe duke u fokusuar në fushat ku përvoja e suksesshme e Hungarisë mund të shfrytëzohet në shërbim të përshpejtimit të procesit integrues të Shqipërisë.
Ndërsa sekretari i Shtetit të MPJ të Hungarisë, Faller, shprehu vlerësimin e tij për progresin thelbësor të arritur nga Shqipëria në drejtim të reformave dhe procesit të integrimit evropian.
Gjithashtu, ai nënvizoi se Hungaria mbështet plotësisht procesin e liberalizimit të vizave të Shqipërisë me zonën Shengen, duke e konsideruar atë një proces teknik.
Në fund, dy palët shkëmbyen protokollin e bashkëpunimit mes dy Ministrive të Punëve të Jashtme, i cili pritet të nënshkruhet gjatë vizitës të afërt të Ministrit të Punëve të Jashtme të Hungarisë, Péter Balázs në Tiranë.
Gjatë kësaj vizite, Sekretari i Shtetit të MPJ të Hungarisë, Jenö Faller, zhvilloi një takim kortezie edhe me ministrin e Punëve të Jashtme, Ilir Meta.
n.e/NOA
