Angli, 19 Shkurt NOA - Është një gjendje mjaft e tensionuar ajo në klubin anglez të Manchester City ku tashmë është një çështje e vërtetë ajo midis trajnerit italian Mançini dhe lojtarit Craig Bellamy.
Lojtari i City, para disa ditësh kritikoi vendosjet në fushë të teknikut të tij dhe madje, mori vendimin që të mos realizonte seancën stërvitore të ditës së ejnte. Mançini pas këtij veprimi jo të hijshëm të lojtarit nuk priti gjatë për të dhënë deklaratën e tij ku tha: "Largohu dhe mos u kthe për tre muaj", - një deklaratë tepër e fortë kjo e teknikut italian e cila i drejtohej në mënyrë tepër të ashpër Bellamy.
Në këtë situatë tepër të vështirë ndërhynë dhe drejtuesit e klubit të cilët u përpoqën të qetësonin këtë gjendje duke folur si me lojtarin ashtu dhe me teknikun e tyre.
Tashmë City ka një sfidë tepër të vështirë me skuadrën e Liverpul në kampionatin anglez dhe përpara saj ajo duhet të përballet me këtë çështje mjaft të ndezur në brendësi të klubit.
r.b/NOA
