Librazhd, 19 shkurt, NOA - Plot 4 mijë paketa cigare të markës "Marlboro" janë sekuestruar sot në kuadrin e operacionit të koduar "Malboro", të dyshuara si mall kontrabandë.
Lajmi konfirmohet për agjencinë e Lajmeve NOA nga burimet policore të Elbasanit, sipas të cilave, kjo sasi cigaresh është kapur në aksin rrugor Elbasan-Librazhd, konkretisht në dalje të qytetit të Librazhdit.
Më tej, thuhet se këto paketa iu gjetën dhe iu sekuestruan në cilësinë e provës materiale, 27-vjeçarit Gledi Gabri, lindur dhe banues në Kapshticë të Korçës.
Ai ishte duke i transportuar ato në automjetin e tij, tip Benz, me targa TR 0827 I, i cili kishte si destinacion tregun e Tiranës.
Gjithashtu, pranë Policisë së Elbasanit, janë shoqëruar edhe dy persona të tjerë për sqarimin e plotë të rrethanave të ngjarjes, por për arsye hetimi nuk bëhen të ditur momentalisht emrat e tyre.
Në lidhje me këtë vepër penale, po punohet intensivisht për dokumentimin e plotë të saj, ndërsa materialet iu kaluan prokurorisë së Elbasanit për veprime të mëtejshme.
n.e/NOA
