Tiranë, 21 shkurt, NOA - Ngjarjet e fundit të rendit në vend kanë bërë që Partia Socialiste të kërkoj nga strukturat e "Policisë së Shtetit funksionimin e tyre sipas kuadrit Kushtetues". Deputeti i PS-së, Pirro Lutaj u shpreh se policia nuk mund të përdoret nga qeveria për të shtyp protesta e qytetarëve, duke ju referuar ngjarjes së ndodhur dje para kryeministrisë me minatorët.
"Ngjarjet e rënda të ditëve të fundit në qytetin e Vlorës, ku në shënjestër kanë qenë përfaqësues të opozitës e posaçërisht Deputeti e Kryetari PS, Eltar Deda dhe një këshilltar i bashkisë; ngjarja e rëndë në qytetin e Sarandës, ku në shënjestër ka qenë një ish prokuror. Si dhe 3 vrasjet makabre të ndodhura në Rajonin e Kamzës brenda një periudhe të shkurtër kohe, janë tregues i qartë se tashmë veprimtaria parandaluese e strukturave të Policisë së Shtetit është një term i harruar", u shpreh Lutaj.
Deputeti i PS-së, ka kërkuar nga policia dhe organet e drejtësisë zbardhjen e vrasjes së deputetit Fatmir Xhindi.
Sipas tij, pas afro një viti, policia nuk mund të justifikohet më me mos gjetjen e autorëve.
"Edhe pak ditë duhen të bëhet 1 vit, që është ndarë nga jeta si pasojë e një vrasje makabre në derë të shtëpisë ish-Deputeti PS, shoku dhe bashkëpunëtori ynë i paharruar, Fatmir Xhindi. Në fakt, deri tani as ne koleget, as opinioni, por as familjarë dhe nëna moshëthyer e të ndjerit Fatmir Xhindi nuk dimë çpo bëjnë strukturat e shtetit për ta zbardhur këtë ngjarje të rëndë, madje konstatojmë me keqardhje se puna e tyre për të hedhur dritë mbi të është zbehur në mos është lënë në harresë", u shpreh Lutaj.
m.xh/NOA
