Shkodër, 23 shkurt, NOA - Dy persona kanë mbetur të plagosur në Krye Bushat të Shkodrës pas një shkëmbimi zjarri më armë gjahu. Lajmi bëhet i ditur nga policia e Shkodrës, ku konfirmohet se të plagosurit janë Dede Laca, 55 vjeç, banues në fshatin Trush dhe Ernest Rrotani, 40 vjeç banues në Krye Bushat.
Policia nuk bënë të ditura ende arsyet e konfliktit, por sqaron se ngjarja ka ndodhur sot rreth orës 07.30, në vendin e quajtur Krye Bushat të Shkodrës, në një rrugë dytësore.
"Të dëmtuarit janë dërguar menjëherë në Spitalin Rajonal Shkodër, për të marrë ndihmën e duhur mjekësore dhe aktualisht ndodhen jashtë rrezikut për jetën", thuhet në njoftimin e policisë.
Gjithashtu, policia e Shkodër bënë të ditur dhe masat paraprake që janë marrë për të zbardhur ngjarjen.
"Nga ana jonë është bërë e mundur gjetja dhe sekuestrimi në cilësinë e provës materiale, i dy armeve te zjarrit, çifte, me të cilat mendohet te jete kryer krimi. Si dhe po punohet për zbardhjen e rrethanave e motivit të ngjarjes", thuhet në njoftimin e policisë së Shkodrës.
m.xh/NOA
