Tiranë, 3 mars, NOA - Minatorët nuk heqin dorë nga kërkesat e tyre ekonomike. Tashmë në listën e ankesave të tyre nuk është vetëm statusi i minatorit dhe mosha e pensionit por dhe varfëria që ka prekur këtë kategori si pasojë e rritjes së çmimit të energjisë.
Ditën e enjte në orën 11.30, minatorët do të protestojnë para kryeministrisë për realizimin e këtyre kërkesave të cilat sipas tyre po rrënojnë çdo ditë ekonominë familjare.
Kryetari i Sindikatës së minatorëve, Fiqiri Xibri i ka bërë thirrje qytetarëve të kryeqytetit t'i bashkohen protestës, pasi kërkesat e tyre janë gjithëpërfshirëse që nga rritja e çmimit të energjisë e deri tek rritja demagogjike e pensioneve.
Xibri ka theksuar se po vihet re një ndërgjegjësim qytetar, por ka ardhur koha që të mos heshtet ndaj kërkesave që cenojnë direkt cilësinë e jetës së qytetarëve.
"U bënë disa kohë që kërkojmë të takohemi me kryeministrin Berisha por kemi parë vetëm heshtjen e qeveritarëve.
Nëse protesta e nesërme nuk do të ketë rezultat pozitiv, kërkesat ekonomike të minatorëve do të kthehen në politike duke kërkuar në këtë mënyrë dorëheqjen e qeverisë.
Javën e shkuar, minatorët u përplasën me policinë gjatë protestës së tyre, pasi kërkuan të takohen me kryeministrin Berisha.
b.a/NOA
