Tiranë, 12 mars, NOA - Estonia angazhohet t'i japë në ndihmë të Shqipërisë në fushën e dixhitalizimit të regjistrave të pasurive të paluajtshme, pasi ajo gëzon eksperiencë në fushën e Teknologjisë së Informacionit dhe rrjeteve të nevojshme të cilat lehtësojnë aksesin e publikut. Një fakt të tillë e deklaroi ministri i Drejtësisë së Estonisë, Rein Lang gjatë një takimi me kryeministrin Berisha. Për këtë qëllim është rënë dakord krijimi i një Taskë Force të përbashkët për marrjen e përvojës nga Estonia në këtë fushë.
Gjithashtu, kryeministri e informoi Lang për progresin që po bën Shqipëria në zgjerimin e shërbimeve online dhe angazhimeve që qeveria ka marrë për rritjen e buxhetit dhe investimeve në fushën e teknologjisë së informacionit.
Duke e konsideruar dixhitalizimin e regjistrave pronësorë një çështje shumë të rëndësishme për Shqipërinë, kryeministri Berisha theksoi se ka angazhuar të gjitha burimet për përfundimin e këtij procesi në një kohë sa më të shkurtër.
Ndër të tjera, kryeministri Berisha duke e informuar Lang, se shumë shpejt Shqipëria do të hapë ambasadën e saj në Estoni, i kërkoi atij të përcjellë në qeverinë e tij dhe biznesin estonez, klimën favorizuese dhe garancitë që ofron Shqipëria për biznesin.
n.e/NOA
