Tiranë, 17 mars, NOA - Ekstradimi i shtetasve shqiptarë të dënuar në Itali dhe njohja e vendimeve të gjykatave italiane për shtetasit shqiptarë, kanë qenë dy nga çështjet që janë diskutuar në takimin e sotëm mes prokurores së Përgjithshme, Ina Rama dhe kryeprokurorit të Anti-mafias italiane, Piero Grasso.
Sipas njoftimit të prokurorisë, në takimin mes dy drejtuesve të organeve të akuzës është rënë dakord për thellimin e bashkëpunimit.
"Është diskutuar gjithashtu për ekzekutimin e letër-porosive respektive që janë në proces e sipër nga të dy zyrat. Gjithashtu një nga temat e prekura në takimin mes prokurores së Përgjithshme Ina Rama dhe prokurorit Anti-mafias, Piero Grasso ishte mundësia e transferimit të disa shtetasve të dënuar nga shteti Italian,për të vuajtur dënimin e mbetur në Shqipëri, gjithçka në zbatim të të gjitha procedurave ligjore", thuhet në njoftimin e zyrës së shtypit të prokurorisë.
Po sipas njoftimit, një tjetër pikë e prekur në bisedën mes Ramës dhe Grasso, ka qenë njohja e vendimeve penale të shtetit italian ndaj shtetasve shqiptarë.
m.xh/NOA
