Tiranë, 19 mars, update NOA - Romeo Leka, është emri i rrëmbyesit të vajzës në qendër të kryeqytetit. Lajmi konfirmohet nga policia e Tiranës e cila deklaron se Leka, është i moshës 25 vjeç dhe ka lindur në Mirditë.
Sipas informacioneve më të sakta të policisë, ngjarja ka nisur në ambientet e hotel Rogner në Tiranë dhe më pas konsumuar në rrugën e Bllokut, ku janë të vendosura disa banka dhe aktivitete të shumta tregtare.
Pengmarrësi mendohet se ka marrë një sasi parash, rreth 500 mijë lekë të reja, në mjediset e Rognerit dhe më pas ka dalë nga ambienti i hotelit luksoz.
Në këtë moment është pikasur nga forcat e policisë dhe për ti shpëtuar një kapje të mundshme në ato momente, Leka ka marrë peng vajzën.
Sipas policisë, vajza ka qenë kalimtare e rastësishme.
Më pas, Leka, ka vrapuar me vajzën në rrugën e Bllokut ku është rrethuar nga policia dhe është bërë i mundur neutralizimi i tij.
m.xh/NOA
