Uashington, 20 mars, NOA - Shtetet e Bashkuara të Amerikës vlerësojnë politikën rajonale të Shqipërisë. Ky qëndrimi i diplomacisë amerikane i është bërë i ditur zëvendëskryeministrit dhe ministrit të Jashtëm, Ilir Meta gjatë takimit që ka zhvilluar sot me zëvendëssekretarin e Shtetit James Steinberg.
Zyra e shtypit e ministrisë së Jashtme njofton se në takimin mes Metës dhe Steinberg është diskutuar për çështjet e rajonit dhe marrëdhëniet mes Shteteve të Bashkuara të Amerikës dhe Shqipërisë.
Zëvendëssekretari i Shtetit, Steinberg, ka vlerësuar në mënyrë të veçantë marrëdhëniet SHBA-Shqipëri. Gjithashtu, ai është shprehur me nota pozitive dhe për kontributin që jep Shqipëria në Afganistan.
"Steniberg ka vlerësuar marrëdhëniet midis dy vendeve dhe angazhimin Shqipërisë në Afganistan", thuhet në njoftimin e ministrisë së Jashtme në lidhje me takimin.
Në fjalën e tij, ministri i Jashtëm, Ilir Meta ka vlerësuar rëndësinë që kanë marrëdhëniet mes Shqipërisë dhe SHBA-ve. "SHBA është aleati ynë strategjik", ka thënë Meta.
Takimi mes dy personaliteteve u bë në kuadër të një vizite që zëvendëskryeministri, Ilir Meta po zhvillon në Shtetet e Bashkuara të Amerikës.
m.xh/NOA
