Shkup, 21 mars, NOA - Partitë shqiptare të opozitës, por edhe një grup të pakënaqurish brenda Bashkimit Demokratik për Integrim kërkojnë nga Ali Ahmeti braktisjen e Qeverisë. Arsyeja ka të bëjë me partneritetit joparimor dhe skenarët me prapavija të caktuara nga ana e VMRO-DPMNE.
Në këtë mënyrë, faktori politikë shqiptarë shprehet kundër politikave aktuale të kryeministrit maqedonas, Nikolla Gruevski. Sipas tyre politikat e Gruevskit rrezikojnë perspektivën euroatlantike të vendit dhe tensionojnë marrëdhëniet ndëretnike dhe ndërfetare.
Një tjetër kritikë nga faktori shqiptarë për kryeministrin maqedonas, është se nuk po zbaton Marrëveshjen e Ohrit, e cila parashikon avancimin e pozitës së shqiptarëve dhe etniteteve tjera në Maqedoni.
Kryetari i PDSH-së, Menduh Thaçi u shpreh se është momenti i fundit, është sekonda e fundit që BDI të lëshoj qeverinë, në mënyrë që të delegjitimohet kjo politikë e mbrapshtë. Thaçi përsëriti se Partia Demokratike Shqiptare nuk hyn në qeveri, ajo ka propozuar një Marrëveshje Politike dhe se PDSH-ja do të ndjekë procesin demokratike dhe të shpallen zgjedhje të parakohshme dhe pas fitores së PDSH-së, pa marrë parasysh se cila parti maqedonase do ti fitojë zgjedhjet, duhet të pranojë platformën e PDSH-së, pra Marrëveshjen politike", u shpreh, Thaçi.
Lidhur me zërat që po shpeshtohen rreth braktisjes së Qeverisë nga ana e BDI-së, dhe refuzimit të PDSH-së për të qenë pjesë e Qeverisë, Imer Selmani theksoi se as DR-ja nuk e ndien të nevojshme dhe të arsyeshme që të jetë pjesë e qeverisë së Gruevskiy.
Mediat shqiptare në Maqedoni shkruajnë se Kryetari i BDI-së, Ali Ahmeti po përballet me presione të brendshme për dalë nga koalicioni.
NOA-INA
