Bruksel, 24 mars, NOA - Grupi i Aleancës Progresive të Socialistëve dhe Demokratëve në Parlamentin Europian, ka hedhur idenë e rinisjes së negociatave mes Partisë Socialiste dhe Partisë Demokratike, për zgjidhjen e situatës politike në vend.
Në një deklaratë të për krizën politike në vend, të shpërndarë për mediat nga zyra e shtypit të Partisë Socialiste, Zëvendës Presidentët e Grupit, Adrian Severin dhe Hannes Swoboda kanë shprehur dëshirën për të ardhur në Tiranë, me qëllimin për të negociuar me forcat kryesore.
Eurodeputetët e majtë sugjerojnë dhe pjesëmarrjen në këtë mision të eurodeputetëve të djathtë.
"Zëvendës Presidentët e Grupit, Severin dhe Swoboda përsëritën vullnetin e tyre që - nëse është e mundur së bashku me kolegët e tyre nga Grupi PPE në Parlamentin Europian - të vinë në Shqipëri dhe të zhvillojnë bisedime me të gjitha palët për të ndihmuar në arritjen e një marrëveshjeje për krizën që po kalon vendi, mbi bazat e një zgjidhjeje të ekuilibruar mbi situatën politike në Shqipëri", thuhet në deklaratën e Grupit të Aleancës Progresive të Socialistëve dhe Demokratëve në Parlamentin Europian.
m.xh/NOA
