Tiranë, 27 mars, NOA - Qeveria shqiptare ka përfunduar procedurat financiare për fillimin e punimeve në projektet që do të ndërtohen në komunën e Graçanicës në Kosovë. Kjo gjë i është konfirmuar ministrit për Kthime dhe Komunitete të Republikës së Kosovës, Sasha Rashiç nga zëvendëskryeministri Ilir Meta gjatë një takimi të zhvilluar sot.
"Lidhur me angazhimin e Qeverisë së Shqipërisë për të kontribuar me fonde për ndërtimin e objekteve social-kulturore në komunën me shumicë serbe të Graçanicës, Zoti Meta e informoi Ministrin Rashiç, se aktualisht është mbyllur etapa e vendim-marrjes dhe fondi prej 400.000 eurosh tashmë është i gatshëm për t'u përdorur në projektet e përcaktuara në bashkëpunim me autoritetet lokale të Komunës dhe të Qeverisë së Kosovës", thuhet në njoftimin e ministrisë së Jashtme në lidhje me takimin.
Ministri Rashiç ka falënderuar zëvendëskryeministrin Meta për kontributin dhe angazhimin konkret të Shqipërisë jo vetëm për progresin e Kosovës në përgjithësi. Ai është ndalur në interesin e treguar dhe kontributin konkret në përmirësimin e jetës së përditshme të komunitetit serb në Kosovë.
m.xh/NOA
