Tiranë, 30 mars, NOA - Raporteri për Shqipërinë në Parlamentin Europian, Nikolaos Chountis, është shprehur se aktet antishqiptare në paradën e ushtrisë greke janë të dënueshme dhe ato nuk mund të ndikojnë në marrëdhëniet mes dy vendeve.
Në takimin e zhvilluar me Zëvendësministren e Punëve të Jashtme, Edith Harxhi, eurodeputeti grek ka theksuar se raste në fjalë janë të izoluara.
"Si eurodeputet i Greqisë, dënoi dhe aktet e vëna re gjatë paradës ushtarake në Greqi, duke nënvizuar nevojën për evitimin e tyre. Nga ana tjetër ai shprehu bindjen se këto akte sporadike nuk mund të ndikojnë në marrëdhëniet e shkëlqyera midis dy vendeve", thuhet në njoftimin për shtyp të ministrisë së Jashtme.
Zëvendësministrja Harxhi është ndalur në plotësimin e kushteve të Udhërrëfyesit për liberalizimin e vizave drejt hapësirës Schengen, si dhe me hapat përfundimtar drejt mbylljes së Pyetësorit të Komisionit Europian. "Liberalizimi i vizave për qytetarët shqiptarë dhe marrja e një përgjigjeje pozitive për marrjen e statusit kandidat, janë dy ambiciet tona kryesore për vitin 2010", ka theksuar Harxhi.
Eurodeputeti Chountis theksoi se personalisht, në detyrën si raporter për Shqipërinë, por dhe i gjithë Parlamentit Europian, është pro heqjes së vizave për qytetarët shqiptarë sa më parë.
m.xh/NOA
